Kodak yimli nung shiba tulutiba?

~ L.Kika  Pongener  Aoyimküm,Dimapur.

Mathi-18:1-4. Iba mapang nungji nutsüngtem Yisu dangi arua asüngdang, Kodak yimli nung shiba tulutiba ?
Luke -9:46. Aser shiba tulutiba ta nutsüngtem rongnung toktepa jembitep.
Mathi-20:20. Zebedi chirtem tetsü-i Yisu tang ashi- item kü chir ana Yakob aser Yohan ne yimli nung ka ne tajichilen aser ka ne tabelen amentsü mela-ang.
Yisu Khrista nutsüngtem rongnunga shiba tulutiba ? Shiba tuluba asütsü ? Shiba tekolak asütsü ? Shiba tanishir asütsü ? ta mapang shia toktepa atishitepa liasü ta asenoki itum aguja aliba laishiba tekongtem nungjagi kuli tejangja angur. Yisui pa nütsüng parnok terana rongnungi tanishir mesüra tekolak shilem tenung jateta shinga meshimtet. Laishirtemi ashiba parnok rongnung Yisui temeimba nutsüngji Yohan liasü,aser tensa mapang aika nung tenüungteta mapa nungloktsüba aser balaka amshiba rongnung Peter,Yakob,Yohan par asem mapang kar nung tenüng tetshia amshiba angutsü. Iba dak alaka parnok terana rongnung pa tekolak mesüra pa tanishir ta shimtetba asenoki osang tajung kakettem nungji mangur. Ajioda ,mapang shia parnok shiba tuluba asütsü ta toktepba ibala shisatsüji parnok ajak mulongjang taroktiba nung inoka alinungji kenü anogo parnok ajak longjemer Yisu dangi arua asüngdang – “Ajangla Kodak yimli nung shiba tulutiba ” ??? aser shibai metet parnok ajungai pei mulong nung pa-ang tulutiba ta ashitsü imlaseta liogo südi. Peter-ia tensa mapang ajak nung pai kü tenüng tamasa ajar asünung paang tuluba ta ashitsü imlaogo südi, Yohan-ia parnok rongnung Yisui pa temeimba,anungji pa-ang tulutiba ta ashitsü imlaogo südi,Yakobia Yisu tenemi tur sentsü melenba mapang nunga Peter o Yohan na den paang anisem,Yirusalemi takok ngua aiba anogo nung Gado chanu anir arutsü yokba nungtua paa dena yok,anungji paang tuluba ta ashitsü imlaogo südi,ajioda parnok ajaki pei sasa paang asütsü ama imlaseta liogo südi. Ajisüaka Yisui parnoki khenyongi meimlaba tila tanur ka anir arua parnok rongnung toktsü aser ashi, shibai ibala tila tanur ama ajemalua kümdir paang Kodak yimli nung tulutiba asütsü ta ashi. Ano tanga mapang ka nung Zebedi kinüngtsüi lar jabaso ana Yakob o Yohan Yisu Khrista yimli kodang arudir ka pa tajichilen aser ka tabelen amentsü asüngdang,ashiko tenati par kuüem medemertem lia iba o-ji Yisu tang asüngdangtsü nüma-medangteti bilemba agi tetsü nemang shidaktsü asütsü. Saka Yisui kechi langzü ,ni koba marok jemdir iba marok-ji tenadi jemtetdi ma ? Yisui timtem reshikangshi taku marok ajemtsü alibaji tenadi jemtetdi ma ? ta asüngdangerba. Yisu nutsüngtem-i Kodak yimli ya alima yimli den meyoktepa angatet, ajioda Yisu nütsüngtemi Yisu Khristai David chuba yimli tu tanaben meyipa bener arua mener Rom nunger nungi nüjiso ngur parnokji par jamirtem asütsü aser Yihuda yimli ka merena yangerteter iba yimli madak parnok yimsüsür asütsü ta alima yimli den meyoktepa angatet südi ta asenoki parnoki imlaa jembiba nung jagi angateter.
Tanü asen putu nunga kin o kin tsüngda, kidong o kidong tsüngda tambu raktepa tiyazü otsü tasen tasen puratepa zülutepba ajanga raratep manener, court nung case agitepba manener, linuk ajunga nung sorkar yimsüsüba mendenji reprangdangra külem tatar rongnunga kilonser menden raktepdang mangatettep aser telemsa adoker,party party tsüngda nung telemsa adoker, yimtsüng putu yimsusuba menden nunga kati ka kübok melitet meputep telemsa agi sünger, mungdang aser arogo nung süshia,loktiliba ajunga nung tulutiba, tekolak, tanishir menden raktepdang teraksa, telemsa, meputep, rarapangsen, tsükchitep adoka lokti ajunga shiranger. Kodang Yakob aser Yohan na tetsüi Yisu tang ne yimli kodang arudir ozü jabaso ana ya ka ne tachijilen aser ka tebelen amentsü melaangma ta asüngdang,iba o-ji angashir tanüngba tangar nutsüngtem kanga jashia ain adoker alitsü,aji agi Yisui ibaji ngur ashi asü masü-ar parnok dang Yisui yamai ashi, bendanger yimsüsürtemi parnok madak kibur akümer aser parnok tulurtemi parnok madak tashi amshir ta nenoki metet. Ajisüaka nenok rongnungbo kodanga yamaji masütsü , saka shibai tulur kümner pa nenok lar asütsü aser shibai tazüng kümner pa nenok kübok asütsü , yamaji nisung chir-a tenzükdaktsütsü masü,saka tenzüktsü aser aika alang pei taküm agutsütsü aru. Yisui Bendanger yimsüsür ta atishia ashibaji Rom nunger yimsüsüur aser tulurtem shirnoki parnok madak tashi amshia kibur akümer parnok agi atishia jembir südi.Ajioda shirnok alimapurtem mojing nem yimsüsüdaktsür parnok jagi tangar madak kibur küma tashi amshir,saka ibala tashiji khenpiga tang lirbo suitemtsü aser tesülenbo parnokji ajak lar akümtsü ta Yisui parnok tang ashirba ta asenoki laishiba nungjagi angateter. (Mathi-20:25-28) tashi züngra tejangja angutsü. Yisu Khristai pa mapang tonga arur ta meteta pa aputsü ghonda ishika dang lia Pa nütsüngtem den kümtettsü benjong chiyunger külen pai parnok dang tatempang tepila o ashitsü tenzüka ashi, “ Ni tebu dangi aotsü mapang atonger,saka shisa tebulu ni nenok asoshi talidak renemtsütsü aser ano ni nenok dangi suneptsüba tanela ka yoktsü aser pai nenok yaritsü, ta tatempang o ashidang ashiko nütsüngtem ajunga mulongjang nung sürabang Yisui ashiba ama pai toktsür orr külen onok rongnung lenir shiba asütsü mesüra Yisui pa charge ya onuk rongnung shiba nem agütsür aotsü ??? ta bilemba Yisui reprangtet asütsü. Anungji Yisui yakta su ka bena aru aser susa nung tzü shiok aser parnok ajak tetsüng shitoktsütsü tenzük. Ajioda ni nenok tesayur sernung ni kechi koda nenok tetsüng shidoktsür yamaji nenok kati ka tenzüktepang ta Yisui pa nütsüngtem dang ashi.(Yohan-13:1-14) tashi züngra tejangja angutsü. Tanishir ,tekolak aser lenir ka asütsüba ya konang nüngsang dangbo masü,iba nungji khuret tulu lir,maparen ajunga nung tekolak ka ama tsüngsak-mepong ajak tamasa pa dak ondaktsü,nüngsen-nüngmen ajak pa dak enloktsütsü,ken o temerang tesepra ajak pai alangdangtsü, nangzük-nangra, tenla-tenji ajunga nung pa tama asütsü,saru-saji ajak tangar tang tamasa agutsür alitsüla. Tanü putu nung nisung aikati ibalaji mangatet tanishir tekolak lenirbo süner nüngsenbo marem,ken o tasak arudang metizükteter,tenla-tenji nung tangar menepa magütsüteter, nübotsükbo maremer,taa magii anogo ka danga angati nübo metsüoktsüteter. Item nisung jagi kodanga tangar madak tekolak, tazüng aser lenir mekümtettsü,pa/lai peisasa kümnüyonga tangari pa/la sülen manidaktsü.
Temeim amangba pur-tem, asenoki asen yimten ,arogo aser lokti nung,asen kidong o kidong na tsüngda nung,asen kin o kin tsüngda nung shiba tulutiba, shiba tambu,shiba tekolak,shiba tanishisang ta toktepa alitsü melena shibai Yisu Khrista-i abenba kangki khuret abentsü ? Shibai Yisui sayuba ama ajak dang tenzüktsü ? Shibai tila tanur ama ajemalua kümteter (?) ta peisasa tila küma ajemalutsü angazükdi,ajioda süra asenoki alima senmangji amangtettsü, putu ka nung tangar kübok timtema alaashia liaka shiri ajemalua tila kümer Yisui sayuba ama lidir, parnok jagi kenübo alimaji anitsü,Tsüngremer maongkaji agitsü.Anungji iba temoatsü senmangji agitettsüsa lidi ta iba Tsüngrem o ajanga tazüngertem den lemsater.Tsüngremi iba o agi ajak moajangma.