Kodang Tsüngremi Tangartem Moatsür

Aser kodang pai pei sasa kanga shisa kaa benshi ta Sauli ajitet, pai pa tsübuseta noktak. 1 Samuel 18:15.
Tenükmeremji teraksatsüba mulungsentsü lir. Iba yagi ne taküm tangatetba raksatsür. Ozüng ter nung ocet ana nung Tsüngremi ibai aitsü. Saul chuba tenük meremba chuba ka liasü aser pa kümzüka mali asü. Israel nungeri Dawid tenüng asangba aser parnok pa tsütsü aoba angu. Israel nungeri Sauli inyakba mapatem motetta liasü, saka Tsüngremi Dawid ajanga takok timba agütsüba asoshi Dawid tenüng asang (1 Sam. 18:7). Parnok tsükchirtem akoktsü asoshi Tsüngremi tashi tuluba agütsüba asoshi pelatsü melen Sauli tenük merem aser Dawid tepsettsü merang.
Khristan taküm nung Tenükmeremji tesempatsü lir. Tsüngremi asenok pa chirtem kümdaktsü. Asenok shinga Tsüngrem chir akümtsü temsüa mali asü, anungji Tsüngremtem pai moatsüba nung medemdangtsü menüngdak. Tenük meremji pei atema dang bilemba lir. Tenük meremi asenok tepela aoyar aser temulung asüba aidoktsür. Tenük meremi temulung merangdaktsüra aser tenüngsang magütsüner. Tenükmeremi tangar asoshi Tsüngrem temoatsüji telatet kümdaktsür aser asenok tali moatsür ta bilemdaktsür.
Sauli Dawid dak kanga tenük merem aser nübur dangi timtem aruba pai mebilem. Pa tenük merem ajanga par kibong raksa.
Ne mulungjang mita liang! Tangari takok anguba nung na mepelai lira, kümdangang! Tenükmeremi ne mulungjang nung tarak teketdaktsü. Iba yagi ne tepela maoyadang aser Tsüngremi ne mulung süa moatsü bilema aliba menokdangdang temulung meyipang. Kodang nai ne takok tangar takok den medemdangtsü bilemdir, Tsüngremi lemang aisü nung na moatsüba bilemtetdakjang ta Tsüngrem dang asüngdangang.