Kodangang Latettsü ?

Election aru shia Naga yimten tebilemtsü latettsüba ya kanga rongdak nüngdaksa jembir saka election temer külenbo Naga yimten latettsüba dang nungibo pei pei department asoshi Delhi nungi sen bener arua inyaktsübajiang rongdak nüngdak tuluba akümer. Aji oda, taoba ita ana jakdang Nagaland nung election agitsü mapang anasai arudang, Nagaland nungbo election masü saka solution-ang tama bushitsüla ta ayimtenba ola tulu angashiogo. Iba kasa tangatetba nung Nagaland nung aliba yimten telok ajaki election masü solution-ang tama bushitsüla ta lemtet. Ajisüaka, BJP telokiang solution atema election agitsüla ta nokdak, anungji iba o ji makok yimten telok ajaki mulunga election nung shilem agiogo. Atangji, election masü solution tama bushitsüla ta asüba o solution atema election agitsüla ta asüba na tangatetbaji khenyongi balala saka anaprongla nungji tebilemdangtsü aser tagitsü shisatsü keta lir. Naga yimten telatetba kati maru tashi Nagaland nung election magitsüla ta asübaji kanga shitak liasü, kechiyong Nagaland asoshibo Indian election ya masü saka Naga yimten tebilemtsü tatem küma latetbasa tajungba asütsü. Naga yimten tebilemtsü ya melatettet tashibo  Nagaland nung Indian election agitsüba timtem lendong keta aliba mapa ka amato kümogo. Ano, election temer külena Nagaland government terenlok mapa inyakba ajak nung Naga nunger linük tenzükertem tebang aittsü, iba jagi mapa teinyaktsü meinyaktet government timatemtsü. Tanü Nagaland merenlokteti timatembaji Naga yimten tebilemtsü melatettetba ajanga lir. Ibaji meteta Naga nunger yimten lenirtem teimbakati election magii solution dang bushinüa nokdakogo. Atangji, Naga yimten tebilemtsü tatem küma latettsübaji mapa tasak, anungji kodangang ka telatetba kati arutettsüar memetet, anungji mapang telatet ka makai election magii solution bushitsübajia mapa temela masü. Ano, election agiyonga Naga lima aser nübortem meimba aser yimten ken o angatetba nisung adoka yimsü süra, ashiko, idangjiang tama telemtetba kati arutsüa akok. Iba tangatetba nung BJP teloki solution bushitsü atema election agitsüla ta nokdak südi. Ibaji magiyatet, Nagaland nung election agiogo aser metsütsüi BJP teloki tongti shilem agitettsüsa government tasen ka kümogo. Joko government kümer ita anabuba aor asünungji, tang yabo Naga yimten tebilemtsü latettsü asoshi kanga temulung agüja jembiba mapang ka asütsüla. Atangji, government nung alir yimsüsürtemi Kohima aser Delhi nung Naga yimten tebilemtsü latettsüba mapa ya teinyaktsü mapatem ajak rongnung tongtibangba asütsü tabo jembiba angashir. Ajisüaka, komaka tashi süoki ia jembir ta asübajiang tongtibangba asütsü. Tang yabo Nagaland nung yimsüsürtem oagi Delhi nung central lenirtem ajuruba noksa anguba aser osang angashiba yabo Naga yimten tebilemtsü tatem küma latettsü temulungtetba nung ken o bener o jembirbo memesük angur aser angashir. Atangji, Delhi nungi sen bener arua Nagaland nung terenlok mapa inyaktsübajia tongtibang aser inyaktsüla. Ajisüaka, ajak külemi oa mejembiaka, yimsüsürtem kar shiteta center government den Naga yimten ken o ya züngzünga süoka jembi meshiogo. Naga yimten tebilemtsü ken o tatem küma melatettet tashibo, ajaki meteta lir, Delhi nungi Nagaland renloktsü atema bener aruba sen jagi terenlok mapa shitak meinyaktettsü. Naga yimten melatettet tashi Naga nunger linük tenzükertemi saru tesarutsübasa aser temeshitsübasa. Idangji, tang NIA purtemi timtem agütsüba amato Nagaland nung tulurtem aika timtem lendongi aitsü. Ashiko, kar atemabo Naga yimten tebilemtsü melatettetbajiang tajangzük asütsüa akok saka Naga lima aser nübortem asoshibo Naga yimten melatettetba ya tebilemtsü onsara tulu kümogo. Iba tebilemtsü yagi Nagaland nung ozünga shitak mamshitetter aser terenlok mapatema kata shitak meinyaktetter. Iba ama asangsang nung ajuruba timtem aser takoksa rajema, kechisüdirsüaka Naga yimten tebilemtsü yabosa tekaratiba nung koktettsüsa khena maneni ochi mulung agi ‘solution’ bushitsüla.