Kodaser Govt. school ajungtsü ?

Taküm 2026 küm Nagaland Board of School Education ajanga agiba class ter tatidang nung tematiba takok angur parnok 56 nem tenüngsang senpet agütsüba sentong nung School Education department nung Advisor-bai parnok 56 rongnung Govt. High School nungi takok angurbo ka danga malia ta temulung machi o ka shisembaji ajak atema tebilemdangtsü aser temerangdangtsü tayongzükba o ka lir. Atangji, Nagaland nung government school junga anepalu mesütetba osangji tanü tasen masü saka temulung masüba o jembi shiaji temulung tagütsüba agüja inyaktsü asoshi tajungshi aser tayongzükba o ka ama ajaki agizüktsüla. Aji oda, government school-tem nung azüngertemi class 10 nung tangar private school-tem nung azünger menepa takok mengutetba asoshi saseta jembiba mapang ya asenok asoshi tamakok anguba kuli bushitsü mapang tajung lir. Atangji, government school nung azüngertemi tematiba takok jenjang mengutetbaji tesayurtem kija dang atongtsülabo masütsü akok, mesüra tanurtem kija aitsütsübajia tim masütsü. Ajisüaka, government school majungba taiji lemzüktsüdi süra government nem lemzüktsütsüla, kechiyong aji government school lir. Government-ji government school-tem madak kibur lir aser kiburi pei school mangu aser mereprangdang nung kodaser ajungtsü ?  Aji oda, school majung dang government nung chief minister-i mesüra Advisor-bai mesüra Commissioner, Secretary aser Director-i government school majungbaji parnok masü saka tesayur aser tanurtem majungba agi majunger amai bilemra government school-tem shirangba tashidak tai puteter asütsü. Atangji, government school-tem nung sayur tesayurtem ajak junga azüngba tashitemetetertem lir saka ashiko, parnok aikati temulung agüja mesayur asütsüa akok. Kasaji, government school nung azünger tanurtemjia tangar tanurtem dang nungi mechiraba aser majungbabo masü saka lesson nung temulung magütsür asütsü. Item tashimaittemji tashi itshidaktsütsü asoshi government nung nisunga lir aser senotsüa lemzüktsür. Ajisüaka, tanü government school-tem majungbaji tesayur aser tanurtem majungba kisünga agia masü saka parnoki school kibur memetet aser kiburia parnok memetet, anungji kibur maliba school ka kodaser ajungtsü ? Nagaland nung private school ajungbaji tanurtem dang nungi fee aika agia sayuba agi masü mesüra tesayurtem nem government school tesayurtem dang nungi teimba ita sen agütsüba agia masü, saka school kiburi tesayur aser tanurtem meteta anepalur aser tesayur aser tanurtemia school kibur meteta pei mapa nung temulung agüja inyaker ta asüba agi takok angur. Ibaji külemi inyakba takok lir. Atangji, tanü government school inyakyim nung Government school shia nung telidak purtem rongnungi yimten aser lokti lenirtem dena Education Committee tenteta aliba angashir, ajisüaka tesem aika nung iba Committee jagi kibur küma khuret abener masü saka school nung tenyatenponger ka ama dang inyakba angur. Ibayongji, government school ki aser temeket koma lir ? Tesayurtem timtem aser nüngdak lir mali ? Tanurtem amenba takdang aser menden koma ? Tesayurtemi tanurtemi angatettsüsa lesson sayur asü mesayur ? Government nungi school atema nüngdak shitak yoker asü meyoker (?) ta asüba nüngdaktemji tebushir-a mali aser tagütsür-a mali ta government school-tem aika takoksa ngudagi. Aji oda, School Education department nung minister, advisor-i anir Commissoner Secretary aser Director-i tonga-tonga oa peisasa pei khuret meteta inyakra, government school-tem ya manger sangwa nung langka ain agi inyaker ama junger alitsü. Joko, tulurtemi anir asenok kibong aser taküm ya government school-tem nem memesüdaktsütsüla saka asenokiang government school mesütsüla, Iba tangatetba nung kodang asenoki asenok meyong government school-tem anepalu tenzükdir, asenok dang nungibo government school nung azünger soru aser jenjang tajungba kümadoktsü. Idangjibo, ano kodaser Nagaland nungbo government school-tem tajungba ta tangari metetnüa asüngdangtsü. Iba ama anogo ka asoshi asenoki khen bendanga agüja inyakdi.