Kofi Annan-i Myanmar taruba hopta semdangtsü

Naypyidaw, September 01 (Agencies): Taoba United Nations (UN) Secretary General, Kofi Annan-i taruba hopta Myanmar semdangtsü sentong renemba osang ka angazükogo.
Myanmar’er Rakhine State Advisory Commission (RSAC) lenitsü asoshi Annan tawa shim saka Rakhine nüburtemi iba ludenji loksatsü takhangba benoka lir.
“Taoba UN lenisang, Annan-i Myanmar taruba hopta semdangtsü sentong renema lir,” ta Rakhine State Government nung Secretary, U Tin Maung Swe-i osang jangjashitsü.
“Annan-i ozü Myanmar linük semdangtsü sentong renema lir. Ajisüaka, pai Myanmar semdangstü anogo tanü tashi lateta mali,” ta Tir Office nung Deputy Director General, U Zaw Htay-ia ashi.
Annan-i aniba züngsem 9 densemba RSAC nem Myanmar kübok Rakhine State nung tongpang rarabaren anentsütsü lenmang bushitsü nungloktsüba den külemi, iba state nung alir nüburtem indang temeten kümzüka ayutsü, parnok nem nungdakba teyari agütsütsü, terenlok bener arutsütsü aser mangatettep ken angatetteptsü tasa aser lenmang bushitsü mapatong takok ngua inyaktsü nungloktsüogo.
Par mapatong takok ngua inyaktsü atema RSAC nem küm 1 agütsüba den külemi, par ludeni bushitetba osang UN nung benoktsü tuyuogo.