Kohima Alibalar Telongjem-i gari nung jana bendentsü bag yanglur

Kohima, August 16 (TYO): Gari nung mener senzüdang gari kichiba nungi jana-ona lenmang nung indokba tebilemtsü atema o lemtepa aruba sülen May 2, 2019 nü Mokokchung District kübok Aliba Village nungi Kohima Alibalar Telongjem (KAT) züngsemtemi gari nung jana bendena indoktsü atema jana indokba bags yanglutsü atema telemtetba agia liasü, ta ketdangsertem osang ka ajanga metetdaktsü.
Gari nungi jana-ona mashie lenmang nung indokba ajanga libajen menentsüba tebilemtsü reprangteta KAT nungi züngsem 24-i iba atemaji langkabosa inyaktsü apiteta gari nung jana bendentsü atema ‘eco-friendly trash bags’ yanglutsü lemtet.
Item bags ji shidoka amshitettsüsa sü agi yanglur, iba denji külemi tzü pongdang tazüng den tanga jana bendentettsüsa yanglu. Tang tashi nung parnoki item bags 100 shi lemtsüogo.
KAT nungi züngsem kati, iba project ajanga lar teloki pei yimtsüng nung tetsürtem dang jana ajanga libajen menentsüba indang awareness agütsütsü ajungshir, ta metetdaktsü.
Kija shiai jana timi bendena indokba ajanga asenok ajungmesotsü aser tim lenmangi anitsü. KAT-i akokba tashi nisung aika ayimjema awareness agütsütsü merangtsü, koba ajanga gari nungi jana meindokdangyongi nisungtemi bilemdangtsüsa akümtsü, aser jana timi indokba ajanga libajen merüka yutettsü, ta parnokisa lemsatepogo.