Kohima Ao Baptist Arogo nung Bodbar aonung sentep ka lepdokogo

~ Chubaba, Dimapur – chuba2019@yahoo.com

Taoba Bodbar ibaji February 27 aonung liasü. Ni Kohima-i nüngdak ka atema Dimapur nungi atu. Saka nüngdak matemba agi Kohima nung ayiptsüsa aküm. Tekülem sentepbosa tekülem sentep asünungji oda Kohima nung saka Dimapur nung saka Bodbar aonung tekülem sentepi aotsü jangraa ni anenba kiyong nung sentep nung adentsü kanga jangraa sentepi ao nung kanga tesüngmangtsüka sentep kidang shinga mali, sentep kia shibanger liasü. Ni kanga süngmangseta meyiba arur asüngdangtep nung ni anenba kiburjia kodanga aonung sentepi maor, aser küm nung anaben dang sentepi aor ta ashi. Ibaji Khristmas anogo nung Yisu asoba bilemteta khen aotsü aser küm tepeyong atema Tsüngrem dang arishi meshia aser temoatsü meshia New Year anepdang sentepi aotsü aser kecha aonunga sentepi maor liasü.
Tesülen sangwar tangar dang asüngdang nung ita nung tatembangba Bodbar aonung tekülem sentep malir ta angashia ni kanga süngmanga liasü. Iba melena kiyonger telongjem jaka jaka nung dang alir ta angashi. Alemli Mejensanger Putu nung kodang asen limai Khrista osangtajung aru, sannükertemi Laishiba nung kechi shia ali ibaji shidak amangtsü, ochishia alitsü aser mauyatsü iba ama tongmelang tesayuba agütsü. Parnok mapang Bodbar aonung mesüra Honibar aonung alu ayip nung sentep kidang tadok meshidaktsü. Deobarnu tzümaleni shishilembatsü ora tadok meshidaktsü. Kechiaser parnoki Amongnu meshiteta ayutsü aser sentep aonung teti sentepi aotsü ajangajanga sayu aser yamaji amanga aru.
Ni angashiba agi KABA nung ano mapang ka nungbo Honibar aonung tetsür kata sentepi arutsü memela saka tebur temeja dang külema liasü. Aji saka sangremer sentep nung temoatsü kangabo mangur ta ajiteta ibaji endok. Ano ni angashiba agi KABA nungsa sentep senshitsü matatetba agi aser Deobarnu balaka pei gari makar bus arishia aotsü nungtepdang tatem sarasadem ken medeni nisung jenti nungzüka aoba ngur oda parnok sülenji ajak aotsü meji tatem sarasadem ken madener. Sannükertemi ya oda par santem kechileni anishir, ta süngmanger.
Yamaisa ora yimdak alirtema Bodbar Honibar aonung yimdaki madoki aluyongertem ayongteper alu nung Fellowship alinunga koma süla. Oda oda Deobarnua alu nungi madoki aluyonger ayongteper temoatsü sentep alu nung dang alinunga Ao Mongdangia kechi ashitsü.
Naga Christian Fellowship Delhi nung kiyonger Fellowship nija kidang linura Hombar, Mongolbar,Brishostibar aser Hokülbar aonung alitsü aser Bodbar aonung tenla kidang tekülem sentepji meraksai Ao Arogo ajak nung amshiba ama kesa liromedema külem nung koda jangratemtsüka alitsü. Temoatsü sentep temer tatem sarasadem temer ano tatem sarasadem ken Kibubai na moajang, Kibubai Pa tejak nu dak yalokjang, Kibubai na nüka liang ta atentsü aser 7 ben AMEN AMEN ta shir pelatepa sentep senshir. Ibaji koda jangratemtsü aser koda temoatsü tulu angur.
Anungji Bodbar aonung ka tekülem sentep malibaji koda tesasatsüka ta bilemer. ABAM aser Kohima Ao Arogoi ya kanga junga shisadang nung koda ta kü tebilemba iba osangkaket ajanga lemsateper.