Kohima aser Dimapur nung ‘World No Tobacco Day’ amung

Parliamentary Secretary, H&FW, P. Longon-i Mongolbar nü “ World No Tobacco day” sentong Capital Convention Hall, Kohima nung agiba mapang jembiba noksa nung angur. 31st May 2016.

Dimapur, May 31 (TYO) : Mongulbarnü Health & Family Welfare Department-i Capital Convention Centre, Kohima nung ‘World No Tobacco Day’ sentong ayongzüka amung aser iba sentong nung tongti tesemdangerji Health & Family Welfare Minister, P. Longon aser tetushi süa jaokerji School Education, SCERT Nagaland Minister, Yitachu liasü.
Sentong nung tongti tesemdanger o jembidang P. Longon-i, “World Health Organization (WHO) ajanga küm shia May 31 nü moko achiba ajanga takoksa bener arutsübatem metetdaktsütsü aser alima ajungalen iba tebilemtsü sangdongtsü nükjidong nung iba anogo amungtsü lemtet” ta ashi.
Küm shia moko ajanga adokba tashidak balala ajanga India nunger million ka den timba asür aser alima nung HIV, AIDS, Diarrhea, dysentery, malnutrition aser gari lendongtem nung asürtem dang nungi moko ajanga adokba tashidaktem agi asürtem timba lir, ta paisa metetdaktsü.
“India linük nung moko timba achiba state-tem rongnung tanabubaji Nagaland lir aser asen state nung arishi küm 8 nungi 13 tsüngda asüdang nungi moko achiba yimya tenzüker. School tanurtemi moko achir aser tang asen state nung tanur noklang nung shilem 41-i pei tsürabur aser kinüngertem atema moko aketba tachitsütem alitsür,” ta P Longon-isa shisem.
Moko machirtem kümzüka ayutsü atema aser ano tanurtem moko nungi jenbua lidaktsütsü atema Family Welfare department-i maneni mapa inyaktsü aser moko achirtemi iba yimya toktsütsü atema yariteptsü, ta paisa metetdaktsü.
Tongti tesemdangerisa School Education & Higher Education department dang Nagaland nung moko anema raraba mapa nung yariteptsü mepisha metetdaktsü.
“Tarutsü anogotem nung ‘Tobacco free school aser rejutem’ alitsüsa department-i yariteptsü aser ano külen Police department-ia state nung moko azüoktsü atema mapa inyaktsüla,” ta P Longon-isa shisem.
Sentong nung tetushi süa jaoker Yitachu-ia o jembidang, sensotemi lenmang, mozüki, school, government office, reju aser public tesemtem nungi moko agientsü atema inyaktsüla, ta ayongzük.
Mokolartemi iba yimya toktsütsü aser moko machirtemi mechidangtsü mesüra metendangtsü atema Yitachu-isa tayongzükba agütsü.
Paisa, tanurtem dang taintem ajungmesotsü aser Nagaland nung tobacco free schools, colleges/institute aser Gariphema village nungeri tobacco free naroküm anguba atema tenüngsang agütsü.
Tanü agiba sentong nung Joint Director H&FW & State Nodal Officer, NTCP, Dr. H. Hotokhu Chishi-i tobacco free school angurtem indang osang metetdaktsü aser parnok nem tongti tesemdanger aser tetushi süa jaoker nati sempettem lema agütsü.
Sentong nung mendenji Secretary, Health & Family Welfare, Senti liasü, Additional director, H&FW Dr. John Sweyievisa-i presentation ka sayu aser Principal Director H&FW Dr. L. Watikala-i anküp tepela o jembi.
Sentong nungsa Don Bosco Higher Secondary School Kohima, Dainty Buds School Kohima nungi Kessica aser moko achir David nungi tayongzükbatem agi.
Mongulbarnü Dimapur nunga District Tobacco Coordination Committee (DTCC)-i Christian Higher Secondary School nung ‘World No Tobacco Day’ sentong ayongzüka agi.
Iba sentong nung tongti tesemdangerji Chief Medical Officer, Dimapur, Dr. Vikato Kinimi liasü aser pai ashiba agi, moko achirtem dak cancer adoker kechiyong moko nung cancer adokba agent dena lir.
Sentong nung Albert Ezung, SDO (civil)-ia ashiba agi, asenoki moko den sendakba khurettem koktettsü atema temelenshi nüngdaker aser asen loktiliba nungi iba khuret agientsü atema khuret süa bilemtsüla.
Tanü agiba sentong nung Dimapur district nung tobacco free school tem nem kulikakettem agütsü, Highland Hall School-i jilushi ka sayu, CHSS nungi Moainla Imchen-i smoke free Dimapur ta ser tayongzükba ka agütsü.