Kohima aser Nuiland lenmangtem nung timtem ajurur

Dimapur, September 27 (TYO): Bodbar anüngdang tzünglu kanga aruba ajanga state yimtiba Kohima-i aoba National Highway-29 nung shilem ka kanga mejungi raksatsüogo.
Dimapur nungi kilometre 20 shi pilar aliba Kukidolong anasa culvert ka tzü agi ponger ao. Iba ajanga lenmang nung gari tulutem senzütsü nokdangogo, ajisüaka gari tilatembo senzüdaktsür, ta traffic police ketdangser kati ashi.
NHIDCL, BO Dimapur, Dy. General Manager, Hage Tachang-ia sangdong ka nung ashiba agi, Kukidolong apu anasa culvert ka tzü agi ponger aoba ajanga gari tulutem nokdanga lir.
Iba culvert yanglutsü atema mapa tenzükogo aser yanü- September 29 nikongdang 5:00 ako tashi nung yangluzüktsü imlar. Anungji, lenmang meyangluzük tashi gari tulutem mesenzütsü metetdaktsür aser traffic ketdangsütsü atema traffic police tem mapa lemzüktsütsü mepishir, ta Hage Tachang-isa sangdong nung metetdaktsü.
Ano, Dimapur district kübok Nuiland sub division nunga lenmang nung mesenzütettsüsa tensa ka ajuruogo.
Tanü New Showuba aser Vihokhu tsüngda aliba culvert ka tzü agi ponger ao saka iba lendong nung nisung yiruba mesüra asüba osang kecha mali.