Kohima Chamber of Commerce & Industry-i aitsür

Kohima, August 20 (TYO): Kohima Chamber of Commerce & Industry (KCCI)-i sangdong ka ajanga, August 19, 2015 nü GS Road, Dimapur nung Aman Jain taküm agitsü merangba mapa tamajungji aitsür ta metetdaktsüogo.
Lokti aser ano balaka shishilembartem dak mapang shia ozüng alema yamai mapa tamajung inyakba ya khenyongi nüji masüba maparen lir, anungji ozüng amertemi tekaratiba nung iba ama tamajung inyakertem pur tapet temerenshi agüja tai maketer nem ochi obendang agütsütsüla ta KCCI-i akhanger, ta paisa ashi.
Ano tanga sangdong balaka nung Dimapur District Citizens’ Forum (DDCF) Tir, Joseph Lemtur-i, Dimapur senso aser shishilembar, Aman Jain dak August 19, 2015 nü injang agi akahba shia bilemtsür, ta metetdaktsü.
“Sangwa lia tasümait mapa inyakbaji onoki sashia aitsür. Onoki ozüng amertem dang tekaratiba nung aibelenertemji pua tapet temerenshi agütsütsü aser ochiobendang agütsütsü akhanger,” ta kasa sangdong ajanga ashi.
Nagaland nung shishilembadak tiyongtsü, Dimapur nung mapangshia sensotem aser ainertemi iba ama tatalokba ajuruba ya joko Dimapur sensotemi maremzüktettsüsa kümdagi, ta paisa ashi.
Onoki ketdangsertem aser sepaitem dang Dimapur tensa tesünep nung alitsü, aser iba tesem ya temzüng alema inyakabatem aser inyykertem tesem ka mesüdaktsüktsütsü mepishia akhanger, ta kasa sangdong ajangasa ashi.