Kohima College küm 50 jungogo; Angh-i skill development nung temulung agütsütsü ayongzük

Abelen nungi – Advisor to CM for Higher Education Deo Nukhu, Angh P B Acharya, KCK Principal Dr. Watijungshi Jamir aser Editor Souvenir Committee, Dr Kevileno Sakhrie nungeri KCK Golden Jubilee souvenir sayatsüba noksa nung angur. 

Kohima, August 9 (TYO): Nagaland aser Arunachal Pradesh Angh, P B Acharya-i shisaliok rejutem dang academic education nungdang masü saka skill development education nung temulung agütsütsü tayongzükba agütsü.
Tanü tetoktepba alima nung skill development aser education külemi aoer, ta Kohima College Kohima (KCK) indang hon jubilee mung sentong nung o jembidang Acharya-i ashi.
KCK ya 1967 küm Kohima Village nungi mangdang aketba nisung pezü- Dr. Neilhouzhu Kire, asür Dr. Satuo Sekhose, asür Vibeilie Solo aser asür Vilalhoulie Belho nungertem lapokba liasü aser February 2006 nung state sorkari agi.
“Alima melenshitsü atema hadir tongtipangtibaji shisaliok ajanga tashi agütsüba lir. Lanurtem timi sayutetba ajanga loktiliba nung terenlok bener aruba dang masü saka linük akangshitsü” ta Angh Acharya-i tanü ashi.
“Nagaland azükarudaktsütsü aser tajungba kümdaktsütsü atema tebur aser tetsür lanurtem tebendang melii, parnok sempettem ajungkettsütsüla. Shisaliok rejutem nung kaketshisatsü sayuba dang masü saka parnok nem skill development tesayubatem agütsütsüla” ta paisa shisem.
Kohima College Kohima (KCK) nungi tesüiba küm 50 tsüngda alumnus 10000 dak tema adokogo aser parnok wadang balala nung lir aser karbo sorkar yimsüsürtem lir aser iba atema kanga pelar. Takok angurtemi loktiliba, state aser linük tashi itdaktsütsü atema tagütsürtem asütsüla, ta Acharya-isa ayongzük.
Sentong nung Higher Education Department Director, Kuholi Chishi-i o jembidang, department-i akokba tashi nung iba reju den yariteptsü aser tajungba kümdaktsütsü ta ashi.
Laisa kaketshirtem dang tamakoktsüba mangdang mayutsü saka takok angutsü atema alizüng tejangja ayutsü aser merangtsü tayongzükba agütsü.
Sentong nung KCK Advisory Board Chairman, Kevisiezolie Suohu-i MLA aser NPF tir Dr Shurhozelie Liezietsu tenüng nung Kohima College indang osang metetdaktsü.
Shitakba agibo iba sentong nung Dr Shurhozelie-i Advisory Committee KCK züngsem ka ama iba shilem agitsüba liasü, saka tawa Angh Acharya den pa mangatettep adoka aliba atema maru.
Alumni Association tir, Neingulo Krome-ia o jembidang, shisaliok bushibaji tasodang nungi leperi mai tashi inyakba maparen ka lir aser Kohima College ya Nagaland nung alirtem atema lennirtem adokdak ka lir, ta ashi.
Sentong nung Kohima College Principal, Dr. Watijungshi Jamir-i okila jembi, Ebenezer Baptist Church pastor, Rev. Keviyiekielie Linyu-i tenüngsang agüja sarasadem aser college lapoker pezü jabasotem- Ziebou Kire, Thejakhrielie Sekhose, Albert Solo aser Vikietuo Belho nungertemi benjungmung nüngtem nung shimo milen tsükloktsü.
Sentong nungsa Advisor to Chief Minister Minister for Higher Education, Deo Nukhu-i jubilee nüngshilung sayatsü aser Kohima College choir o Ayim Longchar (2005 batch kaketshir) nungeri ken ajanga shilem agi.