Kohima College principal-i taidok meshibaji taoksatsüka: HRLN

Kohima, Feb.18 (TYO): Kohima College nungi Wb.Neiphiu Rio nem 2012 küm BA Honours, Pol. Science Certificate taila agütsüba atema Kohima College Principal-i taidok meshia metetdaktsübaji taoksatsüka aser tim masü ta tanü sangdong ka nung HRLN Nagaland Unit nung Co-ordinator-i metetdaktsüogo.
Wb.Neiphiu Rio-i pa Lok Sabha election-i aidang Chief Electoral Officer, Nagaland nem agütsüba certificate-ji taila liasü ta kari ken o ka (FIR) police nem agütsüba sülen iba ken o ya adoker.
Iba dak sendakba maparen tejangja metettsü asoshi RTI ajanga meshiba kakettem nung, Kohima College Authority-i Neiphiu Rio nem 2012 küm BA Honours Pol. Science Certificate agütsü. Iba certificate-ji Neiphiu Rio-i meshia züluba application mali ser agütsübaji kaketreju nung inyakba inyakyim aser ozüng raksaa inyakba mapa ka asütsü, ta HRLN telokisa metetdaktsü.
Iba taila certificate-ji meshir küm ana sülen iba nisung jagi 2014 küm Lok sabha election atema affidavit agütsüdang amshi ta parnokisa metetdaktsü. RTI ajangasa metetba agi, iba taila certificate agütsübaji metongshitsü asoshi 9:10:15 anogo nung Kohima College principal-i Corrigendum Certificate agütsü saka ibaji Returning Officeri magizük, kechiyong election mapang agütsüba affidavit ajak Chief Election Commission office New Delhii yoker liasü aser idangjibo joko Lok Sabha election-a süir liasü.
Nüngtugu kaketreju ka nungi aser idakji tekolakbai inyakyim ajak meteta liaka taila certificate agütsüba atema taidok meshia yimjak nung metetdaktsübaji taoksatsüka aser tim masü, anungji tasüngdangtsü aika adoker. Ozüng memetetba atema kecha taidok maliba ama taidok meshiba jagi kecha masütsü ta taila certificate agütsüba anema nokdakertemi metetdaktsü.
Nisung ka Honours magi graduate sür küm 30 sülen certificate nung Nagaland University ta züluba katidoker ink agi NEHU ta zülur Political Science Honours degree agütsübaji Kohima College Authority-i kecha matidaki inyakba mapa ka liasü ta jangjaogo. Iba maparen ya police-i bushisüngdangdagi, anungji tang ama mapang ka nung Kohima College principal-i tatidok meshibaji tim masü aser kecha kuli mali ta parnokisa metetdaktsü.