Kohima DC den tepila sentong agi

Dimapur, Aenjeti/January 15 (TYO): Kohima, Deputy Commissioner, Rajesh Soundararajan, IAS den Deputy Commissioner conference Hall, Kohima nung Aenjeti/January 15, 2019 nü tepila sentong agiogo.
Deputy Commissioner Rajesh Soundararajan IAS-i Kohima DC mapa 2017 January 5 nü agizük aser küm ana kanga takok ngua inyakba sülen tang pa Mokokchung Deputy Commissioner ama yokogo.
Rajesh Soundararajan IAS-i tepila o jembiba mapang, pai sentong nung dena alir aser talisa DC office Kohima nung staff temi pa asoshi tepila sentong kanga mera keta ayongzüktsüba atema parnok ajak tenüng asang. Pai ashiba agi, Kohima DC mapa abentsü ya pa asoshi khuret tuluka liasü aser pa asoshi khuret tulutibaji ULB elections mapang temzüng ozüng tsütsü mepetmesü adokba tu liasü, ta ashi. Paisa, item tajangshiba ajak ya pa asoshi tangazükba tajung liasü aser tarutsü nung iba amala tensa ajuruba mapang teyari agütsütsü, ta ashi. Maneni DC-i administrative officers, SP Kohima aser pa kübok officer tem, Kohima District nungi MLA tem, NGO aser Kohima kübok lokti tentet balalai, sorkar tenzüker ka ama tenzükba mapang pa nungtia yariba asoshi parnok ajak tenüng asang.
Kasa mapang nung pai, state yimtiba nung mapang tatsüka inyakdang pa kübok tenzüka maparentem maneni tajungtiba nung inyaka terenlok asoshi lenmang shidaki anitsü ajungshi. “State yimtiba asüba yong Kohima ya tanga district dang nungi tera balaka lir aser Kohima DC ama inyakba ya kü asoshi maongka ka lir,” ta pai ashi.
Sentong nungsa DC office staff tenüng nung ADC Kohima, Lithrongla Tongpi Rutsa-i o jembi. Lai, pa kübok küm ana inyakba mapang nung parnoki mapa tajung aika angazükogo ta ashiba den Mokokchung DC mapa belenzüka tajungtiba inyaktsü imlaa ataa aliba lemsatep. SP Kohima, Angami Public Organization, Vice President, Angami youth Organization tir aser Gurkha Panchayat mendenpuba nungeria o tatsütsü jembi, aser parnoki ajaki pa kübok terenlok aser temelenshi tajung bener aruba asoshi pa tenüng sanga liasü.
DC den tepila sentong ya Longasen Lotha, SDO (c) Sardar, Kohima lennisüba kübok aka, shibai tepela anküp o jembi aser Kohima Dobashi temi ken tajung ka aten, ta ketdangser sangdong ka ajanga metetdaktsü.