Kohima DC-i district nung tenokdangba agütsür

Dimapur, Metsüremi/March 22 (TYO): Kohima District nung novel coronavirus (COVID-19) tashidak prokshiba nungi jenbua aser azüoka alitsü nükjidong nung Deputy Commissioner Kohima, Gregory Thejawelie NCS ajanga tang nungi tenzüka tarutsü nung totuyuba tasen ka magütsü tashi inyaka atatsü totyuyba kar agütsüogo.
Tsünglanglen agüja aliba tesemtem nung temulung süa nüburtem lokti nungi pila alitsü majitetba ajanga item tesem nung aliba dokan ajunga shibangtsü metetdaktsü : (a) BOC market aser Mao market (b) Super market (Aonsotsü ayokba tesem) (c) Local ground anasa tetsüng lenmang nung aliba bazaar (d) Razhu point market aser evening bazaar (e)High school junction market (f) Miachieo lhithochu Peraciezie (g) Tetsüng lenmang nung yokya-yokchir ajak (h) Kohima nung second hand dokan ajak (i) Night bazaar aser weekly market ajak (j) Mohonkhola, T.C.P. Gate Area aser Tinpati nung aliba dokan ajak. Saka achi-ajemtsü, aonsotsü, chiyongtsü,, mozü aser tanga nüngdakba osettep ayokba dokan/outlet tem iba tenokdangba nung madener.
Fast food stall, hotel aser restaurant, dhabas, eateries amala tesem ajunga shibangtsü totuyuba agütsüogo. Saka ki tonga bener oa agütsütsü mesüra kidangi bener aotsüpur asoshi item tesemtem nung sorochiokba tesemtem lapoktsü akok, saka health safety mera ajunga agitsüla, ta sangdong ajanga ashi.
Mall, departmental store, gym, beauty parlour, saloon/barber shop aser iba amala tesem ajunga shibangtsü totuyuba agütsüogo.
Maneni sorkar indang bill agizüktsü aser saru balala menoktsü, ajungben nüngdak atema sen agizüktsü aser iba amala nüngdaktem dak alaka bank mesüra financial institution temi nüburtem aotsü memelar. COVID-19 tashidak nungi jenbua alitsü aser iba tashidak prokshiba nungi nokdangtsü asoshi teinyaktsü/totuyuba balala agütsüba ama bank ajungai inyaktsü imlar, ta kasa sangdong ajangasa ashi.