Kohima DC-i gari senzüsenpong atema tetuyuba agütsü

Dimapur, Yimpoksüi/November 29 (TYO): Kohima Deputy Commissioner, B. Henok Buchem-i taruba sentongtem aser highway nung tang mapa tinyakdak aliba dak rangloker gari senzüsenpong dak sendakba nung tetuyuba kar agütsüogo.

November 30 nü Indira Gandhi Stadium nung “Nagaland United: A Gathering of Faith, Hope & Revival” sentong atema gari senzüsenpong anüngdang 12 ako nungi aonung 10 ako tashi azüoktsü.

High School Junction – IG Stadium – High Court Junction – Nagaland Civil Secretariat lenmangtem ya Ring Road ama inyaksangshitsü aser one-way (clockwise) dang asütsü. Ano atakzükja aliba mapang NH-2 nung Northfield Junction nungi Northfield School ajanga RBI Office leni aoba lenmang ya-a one-way dang asütsü.

Kasa mapang nung tanga sangdong ka ajanga DC-i, Hornbill benjung (December 1-10) matong tsüngda gari tulu senzüsenpong nung tenokdangba agütsüogo. Manipur nungi aruba gari tulutem Tadubi-Kidima-Kezo Town-BSF-DBS-High Court Junction ajanger 10th Mile Peducha-i yoktsü. Tanga district temi aotsü atema Dimapur nungi aruba garitem aonung 10 ako matong tsüngda Kohima-i aittsü memelatsü aser item garitem dang Peducha-Tsiesema (10 Mile)  lenmang amshitsü tetuyuba agütsüogo. NH-2 nung Kisama leni aoba gari tulutem aonung 10 ako sülenang senzütsü melatsü.

Gari tulutem atema tetuyuba balala agütsüba ya December 1 nungi 10 tashi benoktsü. Maneni Executive Engineer of National Highways, Kohima Division-i osang agütsüba sülen Liezocha (Chainage 173.300 km) aser Kezanu (Chainage 175.350 km) anasa National Highway-29 nung lenmang ya six-wheeler truck tashi gari tulu senzütsü atema lapoktsüba metetdaktsüogo.