Kohima DC-i HoDs aser ketdangsertem den senden amen

Kohima, February 24 (TYO): Kohima Deputy Commissioner, Rajesh Soundararajan IAS-i Kohima district kübok Office balala nung tekolakpurtem aser February 2, 2017 aonung kiojen raksaba/arongba office ketdangsertem den co-ordination senden ka February 24, 2017 nü DC Conference hall, Kohima nung ayonga menogo.
Iba senden ya office tem kongshiba/raksaba indang o lemteptsü aser item office ji khen atema tanga district tem nung aliba office tem aser takdanga tali aliba külem department tem nungi inyaka atatsü atema jembi.
Iba senden nung DC-i, iba aonung office ajak agi semer (30) raksa, aser item rongnung office 17-ibo parnok indang report agutsüogo, ta metetdaktsü.
Tanüngba office tem danga asüng nikongdang (February 25) tashi nungbo sorkar nem report agutsütsü paisa metetdaktsü.
February 2 aonung tatalokba ya tia maka, ta shia DC-i, iba ya item office tem atema dang masü saka state atema-a takoksa tulu lir, kechiyong kanga meranga inyakba office ajak raksaogo, ta ashi.
Paisa, “Longjemer inyakba sayutsü atema amalitepa inyaktsü aser yaritepa inyaktsü nüngdaker aser lendong agi kongshiba department tem asentenshitsü atema yaritsüla,” ta ashi.
Iba dak sentakba nung DC-i Office ajak nung tekolakputem dang peipei office building nung takdang talila aliba reprangshia asüng nikongdang (February 25) tashi nung osang agüjang, aser item takdangji ita ishika atema amshia atatsü, ta ashi.
Paisa office balala ketdangsertem dang, iba ya süoki ia agitsü aser timtem agi kongshia aliba office tem atema lenmang bushitsü ajungshi.
ADC, Lithrongla Tongpi-ia, iba tatalokba mapang Kohima Village Youth Organisation-i osettsüset kar ngutetogo, aser itemji DC Court nung Dobashi ket nung lir, ta metetdaktsü.