Kohima DC-i kisüdang aluba jana mashi meindoktsü metetdaktsü

Dimapur, November 20 (TYO) : Aruyaa aliba Hornbill Festival mapang state yimtiba, Kohima merüka alitsü aser tetsüdaktsü melii traffic anisüngzüka jajadaktsütsü mechi nung kisüba osettsüset anüngalutem – lung, lung tsüksar aliba, yindong, lisem, cement amala den anakona mesüra ali onzükbatem Kohima jila aser National Highway lenmangtem südaka meindoktsüla, ta Kohima Deputy Commissioner, Rovilatuo Mor, IAS-i ozüng agütsüogo.
Iba dak sendakba nung Kohima Deputy Commissioner-i, jila tiyong aser National Highway nung alir kija aser kibongtem ajaki tekalen shia aliba osettem ajak November 26, 2016 nü (Honibar) tashi nung agientsüla, ta tetuyuba agütsüogo.
Atakteta yutsüba mapang shitak tashi nung shia aliba osettemji magieni lira item osetji bener oa intoktsütsü, ta pai metetdaktsüba sangdong nungji shia lir.