Kohima DC-i sangdonger

Kohima, Monupii/May 03 (TYO): Kohima DC, Rajesh Soundararajan, IAS-i sangdong ka ajanga New Secretariat Road nung gari ayuba tesem den workshop kiburtem aser servicing stations kiburtemi parnok mapa ajanga ali atsünga agir, ta metetdaktsü.
Gari ayudak aser Workshops ajanga gari yanglushitsüpurtemi gari lenmang nung gari anendena ayuba ajanga gari senzüsempongba nung kongshiba den lenmang raksatür; iba denji külemi servicing stations aser gari shidokba tzü ajanga lenmang nung tzü ayimer, aser ibaji ajanga gari lenmang kera raksatür, ta paisa metetdaktsü.
Iba dak sendakba nung DC-i gari ayudak, workshops aser servicing stations dang garage tesem dak alaka tanga nung gari anena yua alibaji anogo pongu tsüngda agientsüla, ta metetdaktsü.
Paisa, gari ayuba tesem dak alia tanga nung gari meyanglushitsüla aser gari servicing stations aser gari shidokba tzüji gari lenmang nung meyimdaktsütsüla, aser kiyong nung mopung memenen-daktsütsüla, ta metetdaktsü.
Iba tetuyuba ya tang nungi tenzüka mapa küma inyaktsüla, aibelenertem dang ozüng nung aliba ama merenshitsü, ta sangdong nungsa shia lir.