Kohima DC Thejawelie-i ‘Tefü Dzeda’ kaket sayatsü

Kohima, Luroi/August 12 (TYO): Hombarnü Kohima Deputy Commissioner, Thejawelie Gregory Sote-i otsü kaket ‘Tefü Dzeda’ sayatsüogo, ta ketdangsertem osang ka ajanga metetdaktsü.
Iba senong nung jembidang kaket publisher, Prasielie Pienyü-i, asür Rheichalie Pienyü-i mezüng 1904 küm Aesop’s Fables kaket nungi Tefü Dzeda ya Greek oshi nungi Tenyidie oshi agi meyipzük, ta metetdaktsü.
“Otsü tatsü aliba kaket nung ya otsü 38 keta lir, koba ajanga tazüngertemi tansütsü otsü aser tangazükba aika angitsü,” ta asür Rheichalie’er tanabuba semchir, Prasielie-i metetdaktsü.
“Iba kaket ya kanga nüngtugu fables kaket lir, ibayongji taintem, shisashirtem aser temeimer kari iba kaket ya tanaben adoktsü mepishia liasü. Anungji ni iba kaket ya original form nung publish asü. Iba kaket azüngertem tajangzük angutsü ta ni imlar,” ta pai ashi.
Kohima Village nung sentong tatsüka ayongzüka iba kaket sayatsüdang Kohima Deputy Commissioner, Sote-i Prasielie-i kaket tejen ya ajaki züngtettsüsa tanaben publish asüba atema pa dang pelaba lemsatep.
Kohima Deputy Commissioner-isa, iba kaket ya tanur-tain ajaki züngtettsü aser school syllabus nunga inoksemtsü imlar, ta ashiba den külemi iba kaket ya English nunga meyipzüka ajak ajangzüktsü atema publish asütsü, ta ashi.
Chairman P Khel Council, Kruyie Pienyu aser President Kohima District GB Association, Vineipra Pienyu natia iba sentong nung jembia liasü.
Neikiezoü Kire-i sarasadema iba sentong tenzük aser Khriesatuonuo Pienyü den medemertemi kongki tema ken ka aten.
Iba sentong lenir, Zeneituo Pienyü-i, iba kaket jenjang ya sen 100 lir, aser Baptist High, Kohima anasa Peak Agency nung talitsü angutsü, ta metetdaktsü.