Kohima Deputy Commissioner-i lenmang yangluba semdang

Dimapur, Rongchii 11 (TYO): Deputy Commissioner Kohima aser RTA Kohima mendenpuba, Rajesh Soundararajan den Kohima District Disaster Management Authority aser Kohima Traffic Police OC nungertemi Soul Harvesting Church anasa Tinpatti-Naga Hospital Authority sendaktepba bypass lenmang nung retaining wall yangluba tanü semdang.
Nüburtem nem anisüngzük agütsütsü asoshi R&B PWD ajanga tajungtiba aser tekeraba nung iba lenmang yanglur, ta Deputy Commissioner-i ashi. Iba lenmang nung senzüsempongtsü mejungi akümba ajanga shibanga atatsü totuyuba agütsü, anungji tanga lenmang nungi senzütsü asoshi nüburtem dang mepeshir, ta pai ashi.
Kasa mapang nung paisa Kohima district disaster management fund nungi iba mapa inyakba nung yariteper nem süngo ajemtsü asoshi sen 5000 agütsü. Nüngdak dang süra iba timtem agi kongshia aliba nüburtem nem khen atema anisüngzükdak ki agütsütsü renema lir, ta paisa shisem.
Iba timtem agi kongshiba lenmang ya tasazük lenden nung feet 100 aser modong nung feet 35 lir, aser iba lenmang yanglushiba mapa ya ita ka nung tembangtsü, ta PWD executive engineer, Hokato Sema-ia kasa mapang ashi.