Kohima District Jail nung alirtem atema sensitization sentong katsü

Kohima, September 19 (TYO): September 15, 2017 nü District Tobacco Control Cell Kohima-i District Jail Kohima tepoukdak alirtem atema ‘Harmful effects of Tobacco & COTPA 2003’ indang sensitization programme ka ayongzüka katsüogo.
District Nodal Officer, Dr. Arenla Walling-i Nagaland nung moko chiyungtsütem dak sendakba indang jembia liasü, aser iba mapang nung lai, tangbo moko ya alima nung nisung timtiba asüba ‘agent’ ka lir, ta metetdaktsü.
Prohibition Act of COTPA 2003 indang jembidang lai, iba ozüng alema aibelenertem dang senchi achir, ta shia shilem agirtem danga pei nüburtem nem iba awareess agütsütsü ayongzük.
District Leprosy Officer, Dr. Aseno John Rhetso-ia Iodine Deficiency Disease aser leprosy tashidak indang metetdakja liasü. Iba sentong nung nisung 105-i shilem agi.