Kohima district kübok sorkar school tajungtibatem nem tetushi agütsü

Dimapur, Metsüremi/March 7 (TYO): Kohima District Administration aser District Hub For Empowerment Of Women (DHEW), Kohima na longjemer Kohima District nung Beti Bachao Beti Padhao (BBBP) sentong kübok tajungtiba inyaksangshiba sorkar school tem nem tetushi agütsüba sentong ka March 7 nü DC Conference Hall, Kohima nung ayongzüka agiogo.

Sentong nung Deputy Commissioner Kohima, Kumar Ramnikant, IAS-i ashiba agi, Beti Bachao Beti Padhao, Mission Shakti ajanga tetsür tanurtem kaketshisatsü angazüka teburtem den kasa akümtsü asoshi maongka agütsüogo. Paisa, India renloka alima nung economy tulutiba rongnung ka ama tejakdangi aotsü atema tetsür tebur mebendangi lisopurtem ajaki shilem agitsü nüngdaker ta ashi.

Lokti nung tetsür aser tebur tsüngda kecha tebendang malitsüla ta shia, DC-i sentepa aliba lokti dang sobaliba balala ajanga tetsükdaktsü adokdaktsüba tongpoka oa ajak liromedema aiba lokti ka yangertsü ajungshi.

Ramnikant-isa, tetsür tanurtem nem kaketshisatsü angazükdaktsütsü aser parnok temaba jenjang tongteta Nagaland ya yimjiyimjung nung aliba state ka kümdaktsütsü atema tejakdangi aotsü ajungshiba atema tetushi anguba school tem nungi faculty, staff aser kaketshirtem nem tenüngsang agüja liasü. Maneni DC-i district administration-i takokba tashi teyari agütsütsü tenangzükba agüja liasü.

Kasa mapang nung lokti pela agizükba o jembiba mapang District Education Officer Kohima, Emilo Patton-i, BBBP kübok sobaliba dak sendakba nung tetsür tem jenjang tajungba kümogo, ta ashi. Laisa, Kohima District nung tetsürtem enrolment aser academic performances naprongla nung tajungba kümogo, tetsürtemi saisapong aser tanga co-curricular activities tem nunga takok tajung nguogo, ta ashi.

Patton-isa, taoba küm pezü tsüngda HSLC tatidang nung sorkar aser private school naprongla nung tetsürtem pass enrolment aser pass percentage tebur dang nungi tajungba lir, ta ashi. Maneni HSSLC tatidang nunga Arts Stream nungbo enrolment aser pass percentage teburtem dang nungi tajungba lir, saka science aser Commerce stream nung meranga inyaktsü nüngdaker ta ashi.

Category balala nung GPS Garuzou, GMS Aradhura Lerie Chazou, GHS Chandmari aser Razukhrie Government Hr. Secondary School nunger nem tetushi agütsü. Item school tem nem kuli kaket aser senpet agüja liasü.

Iba sentong ya EAC Kohima aser Nodal Officer, Mission Shakti, Moasunep K. Jingru lenisüba nung agia liasü.