Kohima District nung Childline se dosti campaign tembangogo

Kohima, Yimpoksüi/November 30, 2018: Yashi (November 29, 2018) Jakhama nung CHILDLINE awareness sentong agiba sülen Childline Kohima team den St. Joseph college nungi women’s forum züngsmetem külemi tangokba noksa nung angur.

Jakhama (Kohima), Yiompoksüi November 30 (TYO): Küm shia agiba campaign CHILDLINE SE DOSTI dak sendakba nung Yimpoksüi/November 14 anogo nungi tenzüka CHILDLINE Kohima-i Kohima district nung sentong balala agiyonga aruba sülen November 29 nü tembangogo, ta CHILDLINE osang ka ajanga metetdaktsü.
Iba campaign ajanga lenla balala nung nisung ajakji loktiliba nung tanurtem jenjang tajungba kümtsütsü atema CHILDLINE’s osang proker kaka asütsü ayongzüker, ta parnoki sangdong ka ajanga metetdaktsü.
Iba campaign rongnung-mozükidang tanurtem jangratema monga taneptsü angutsü atema Paediatrics ward, Naga Hospital Authority Kohima nung noksa balala inoka kilung sobutsüba densema liasü.
Team den volunteers aser temelungertemi Kohima nung South Police Station, North Police Station aser Women Police Station semdang aser police ketdangsertemi melungsoa CHILDLINE Dosti tenangzükba agiba sülen tekanük nung Suraksha band mesü, koba ajanga CHILDLINE atema inyaktsü aser tanurtem kümzüktsü nangzüker. Ano police station balala nung CHILDLINE indang ozülu balala mesanga yutsü.
Team-isa social media ajanga iba campaign osang prok aser CHILDLINE 1098-i inyaka aruba mapatem metetdaktsü.
CHILDLINE Kohima-isa Kohima village students Union (KVSU) den senteper Kohima village aser temeket tesemtem nung public address system amshia awareness agutsüba den CHILDLINE services indang metetdaktsü.
Iba campaign tembanga Loyola Higher secondary school, Jakhama nung Nov 28 nü aser St. Joseph College Jakhama nung Nov 29 nü awareness sentong katsü.
Iba nükjidongji kaketshirtem nem toll free 1098 helpline number indang metetdaktsütsü aser tanur ka timtem nung aliba mapang nung 1098 dangi call asüba ajanga CHILDLINE dost kaka akumtsü atema tayongzükba agutsütsü asoshi liasü.
CHILDLINE Kohima-i NHAK nung managing director, medical superintendent aser medical officer i/c Paediatrics ward aser Matron dang pelaba metetdaktsüogo aser SPS, NPS den Women Police Station nung SDPO, OCs, SJPU dang pelaba lemsatepogo.
Parnokisa KVSU Tir aser züngsemtem, Integrated Child Protection Scheme(ICPS), school Principal aser ketdangsertem danga pelaba lemsatepogo.
Collaboration director, Childline Kohima, Mezhi Sorhie-i state nung senso ajak CHILDLINE tembar ka akumtsüla, kechiyong tanurtem kümzüka ayutsüji ajak asoshi tebilemtsü asütsüla, iba denji külemi timtem nung aliba tanur ka yaritsü atema ajaki tenangzükba agitsüla, ta ayongzük.