Kohima district nung Dr. Ambedkar tasoba anogo amung

March 31, 2016 nü Khouchiezie nung TMGHSS, Kohima kaketshirtemi Dr. Ambedkar tasoba anogo nüngtem nung Peace Walk Rally agidang tangokba noksa nung angur.

Dimapur, March 31 (TYO) : March 31, 2016 nü T.M. Government Higher Secondary School (TMGHSS), Kohima nung Dr. Ambedkar Youth Convention & Rally for National Unity ayongzüka agi.
Iba sentong nung tongti tesemdangerji taoba Prof. HOD English NU Rev. Fr & Dr. A.J. Sebastian, SDB liasü.
Tongti tesemdanger o jembidang, Sebastian-i ashiba agi, “Nagaland nung kin aika lir aser asenok tsüngda rarabangsen malitsüla saka asen lima nung yimjung bener arutsü atema külemi longjemtsüla.”
Paisa, kin nung ajemdaker meputep aliba agientsü aser tesentaktep yanglushitsü atema tayongzükba agütsü.
Sentong nung ZD, NYKS, Jackie Ruivah-i o jembidang, Dr. B.R. Ambedkar sro küm 125 ajungba nüngtem nung linük nung sentong balala ayongzüka agitsü atema India sorkari telemtetba agi, ta ashi.
Linük kübok district 1-5 nung Dr. Ambedkar indang tasoba anogo nung sentong balala ayongzüka agitsü atema India sorkari NYKS nem mapa lemzüktsü aser sentongtemji Dr. Ambedkar foundation, Ministry of Social Justice & Empowerment, GoI ajanga teyari agütsür, ta Ruivah-isa metetdaktsü.
Tanü Rev. Fr and Dr. A.J. Sebastian, SDB-i Peace walk rally tenzüktsü aser ibaji TMGHSS nungi tenzüker Khouchiezie (local ground) nung tembang.
Sentong nung DYC, NYKS Kohima, John Makhabo-i tesentepertem pela agizük aser TMGHSS Principal-ia o tatsüka jembi. Iba sentong nung TMGHSS kaketshir 250-i shilem agi.