Kohima district nung RTI Week ayongzüka among

Kohima, Mongputeni/October 10 (TYO): Mongputeni/October 5 nung 12, 2018 tashi RTI Week amongba dak sendakba nung Sangtennü/Mongolbarnü Kohima district-i awareness sentong ka ayongzüka “RTI and Role of Citizens” omen nung ajemdaker Right to Information week mongogo, ta ketdangsertem osang ka ajanga metetdaktsü.
Deputy Commissioner Office’s Conference Hall, Kohima nung ayongzüka amongba sentong ya PIO aser ADC Kohima, Lithrongla Tongpi Rutsa leniba nung agi aser laisa lokti pelaa agizükba o jembia liasü aser First Apellate Authority & Deputy Commissioner, Kohima Rajesh Soundararajan, IAS-i okila jembi.
Pai, sorkar ketdangsertem mapangshia ajurutepa osang lemsateptsüla aser RTI structure nung densemba osangtem update asutsüla, ta ashi.
“RTI malidangbo osangtsüsangji temeden ka masü saka maongka ka dang liasü, aser loktiliba nung nisung kari dang osangtsüsang nguteta liasü,” ta ashi.
Paisa ketdangsertem dang pei mapa kanga teladak süa inyaktsü ayongzükba den külemi mapang shidak nung RTI application atema inyaktsü mepishia metetdaktsü.
Kasa sentong nung Chubasanen, EAC Kohima and Sizin, EAC Kohima-i Powerpoint presentation ajanga RTI indang metetdaktsü.
Awareness sentong nung shisalen sayurji Deputy Director (Training) ATI, Dr. Hovithal Sothu liasü aser paia RTI Act inyakyim tejangja metetdaktsüba den külemi ketdangsertemi metetnüa asüngdangbatem langzüa liasü.
Iba sentong tembanga RTI indang Documentary Film “My Right, My Voice” saya aser APIO & SDO (C) Sadar, Longasen Lotha-i tepela anküp o jembia liasü.