Kohima district nung tzümetsüng ajanga takoksa bener aru

Kohima, August 30 (TYO): Kohima district kübok Western Angami tesem nung tzümetsüng ajanga tsüklu 40 shi raksatsüogo.
Iba ya Thekrejuma aser Dzüleke yimtsüngtem nung atalok.
SDO (C) Sechü-Zubza, Mhomo Tungoe-i ashiba agi August 27 aonung Thekrujuma yimtsüng nung tzümetsüng lendong atalok aser idangji aluyimer 20 shi kati takoksa ajuru.
Thekrujuma nung tzümetsüng ajanga ayongküm anatsülen tsüklu raksatsü aser ano gari lenmang aser electricity nunga timtem agütsü, ta SDO(C)-i ashi.
Iba tasüngji SDOC(C)-i Dobashi aser ketdangsertem den külemi tzümetsüng agi takoksa bentsür aruba tesemtem semdang.
Chathe ayong nung apu ka ajanga Thekrujuma yimtsüng den sendakteper saka tzümetsüng ajanga iba apu den electric poles ponger ao.
Ketdangsertemi takoksa anguba asadangdang aluyimer 20 shi kati takoksa anguba osang angazük. Ajisüaka, parnoki ayong adener yimtsüng tonga moutetba ajanga osang tejangja mengutet.
Yashi ayong nung tzü ajema aküm aser iba jagi yimdaklirtemi süng agi tetsüng apu ka yanglu aser iba sülen ang takoksa anguba osang tejangja bushitepdar, ta SDO (C) Mhomo Tungoe-i ashi.
Iba osang ya District Disaster Management Authority Kohima nem sangoktsü aser parnoki agriculture department nungi ketdangser telok ka tesem tonga yokogo, ta paisa ashi.
Tzümetsüng timtemji yim temalen atalok asü nungji alui tzü bener aruba ajak raksaogo aser ibaji khuret tulu ka lir, ta Thekrejuma Village council chairman, Rüüngutuo Kruse-i ashi.
Paisa ashiba agi, yimtsüngi tzü tajemtsü bener aruba pipe tema raksaogo aser tzümetsüng nung kiset shirurutem aika asü.
Chathe ayong ajanga Medziphema town, Medziphema village, Rüzaphema village aser SASRD den ano temeket aliba tesem kar nem tzü tajemtsü agütsür. Ajisüaka, tzümetsüng ajanga kilometre 5 shi ka nung water connectivity raksatsüogo.
Osang ajangasa ashiba agi, Khonoma kübok Dzüleke nunga kasa tzümetsüng lendong ka atalok.
Tzümetsüng ajanga Dzüleke nung tsüklu 10 shi ka raksatsüogo, ta osang ajangasa ashi.