Kohima district Swachhta Pakhwada sempet agütsü

Kohima, Rongjui (September) 14 (TYO): Kohima district kübok Swachhta Pakhwada (Cleanliness & sanitation) indang sempet agütsüba sentong tanü agi.
Sentongji Samagra Shiksha Abhiyan Kohima-i ayongzüka DC conference hall nung agi.
Kohima Deputy Commissioner aser chairman DMA, SSA Rajesh Soundararajan-i sentong nung o jembidang kaketshirtem aser tesayurtemi merükmejuba anogo nung dang masü saka anogoshia merükmejutsü aser merüka alitsü indang tangatetba adokdakjang ta ayongzük.
School ka merüka ayuba mesüra menena ayuba ajanga school ketdangpurtem aser kaketshirtem indang maitsü sayur. Tesayurtem aser kaketshirtemi anogoshia merükmejua alitsüba indang osang proktsüla, ta Soundararajan-isa shisem.
Sentong nung Sub-divisional education officer aser EBRC Tseminyu chairman Ramdi Thou-ia o jembidang, temeket merüka aser tiptema ayutsübaji senso shia indang teinyaktsü khuret lir, ta ashi.
Asenoki anogoshia merükmejuba nung mapang endoktsüla aser tangar danga merükmejutsü ajungmesotsüla, ta paisa ashi.
Tanü Kohima district kübok sorkar school 9 nem sempet balala agütsü. Clean toilet, essay & drawing /painting competition tetoktepbatem atema sempet agütsü.
Clean toilet tetoktepba nung GPS Zunpha Tseminyu-i mezüngbuba jenjang, GMS K. Khel Viswema-i tanabuba aser GPS Dzükhwekie-i tasembuba jenjang takoktem angu.
Essay tetoktepba nung Kiriangwi (class-8) GMS Bayavü-i mezüngbuba, Zenlo Keppen (class-10) GHS Tseminyu town-i tanabuba aser Kechalo Apon (class-8) GHS Kandinu- tasembuba jenjang angu.
Drawing/painting tetoktepba nunga Khriezhünuo (calss-3) GPS Nerhe Phezha-i mezüngbuba, Nyaipa (class-5) GMS K. Khel Viswema-i tanabuba aser Shanti Lal (class-4) GPS Tseminyu old town-i tasembuba jenjang angu.
Sentong nung mendenji assistant district co-ordinator DMA,SSA Kohima Thongsenlo liasü, Kohima District Education Officer cum DPC, DMA, SSA Piholi Swunetho-i tesentepertem pela agizük aser project Asst. DMA, SSA Kohima Rokoneinuo-i anküp tepela o jembi.