Kohima District Task Force senden amen

Tongpang Ozukum, Minister Incharge and Shri Dr Nicky Kire, advisor in charge, Covid-19, Kohima District Task Force na den opposition MLA Khriehu Liezietsu aser Keneizhakho Nakhro nunger Naga Hospital Kohima nung tangokba noksa nung angur.

Dimapur, Rongchii/April 12 (TYO): Covid-19 dak sendakba nung Tongpang Ozukum aser Dr Nicky Kire, Minister & Advisor in-charge, Kohima district nati ayongzüka Kohima District Task Force senden tasembuba Kohima DPDB Hall nung April 11 nü menogo.
Iba senden ya Kohima district Minister In charge Tongpang Ozukum lenisüba kübok agi, kong Kohima district nungi MLA tem ajak, Angami nunger lokti tentet tongtibangtem aser DC & CMO Kohima-i anir task force züngsemtem ajak dena liasü.
Senden nung züngsemtemi state sorkar dang state ajung aser interstate arrtsü ajak maneni mokdanga ayutsü asoshi benoktsü lemtet, kechiyong iba inyakyim ya kanga tongtibang ta angateter.
Prnokisa, Kohima toktsür moteti aliba kaketshir aser ayangertem pei district-i meyipa aotsü asoshi lenmang kar lapoktsütsü atema state sorkar dangi abentsü lemtet.
Senden nungsa, lokti nung nüburtem tsüngda tetsüngda ita yur inyaksangshiba inyakyim maneni benoktsü aser talisa shishilembatsü asoshi mapa atakzüktsür aliba mapang iba inyakyim benoka inyaktsü lemtetba den yimtsüngtem nung tenüngdakba osetem agi anüapongba aser lemyalemkoba nung teka amteper inyaktsü asoshi core committee ka tentettsüogo.
Lenmang balala nungi Kohima district nung tzü supply agütsüba onüka iba senden nung benoka jembiogo aser Kohima nung aliba nüburtem nem tzü peria agütsütsü asoshi tensa asadanga alitsü atema core committee balaka tentettsü telemtetba agi.
Minister Tongpang Ozukum aser Advisor Dr. Nicky Kire nati district administration, medical department, police department, media personnel aser yakbang nung inyaker ajak nem tenüngsang agütsüba den iba tetsübutsü tashidak den raratsü asoshi takok tashi tajungtiba inyaktsü ajungshi.
Tenatisa APO aser tanga lokti tentet ajak nem tenüngsang agütsü aser talisa state mokdanger aliba mapang Angami Youth Organization (AYO)-i Task Force den teka amteper inyakba atema parnok nem tenüngsang agütsü.
Kiyong balala nung lenir aser volunteers temi shilem tajung agiba atema tenüngsang agütsüba den Tongpang Ozukum-i parnok dang maneni district administration den teka amteper inyaktsü mepeshi.
Senden tembangba sülen Minister Incharge-i anir Task Force-i Naga Hospital Authority Kohima (NHAK) semdanga inyakyim tem asadangogo.
Kohima district incharge lemzüktsüba sülen Tongpang Ozukum, Minister in charge aser Shri Dr Nicky Kire, advisor in charge nati March 26 nü mezüngbuba district task force senden ayong amen.
March 28 nü parnoki Inter state gate Khuzama, District TB & Chest Hospital, Khzama aser designate COVID Hospital, Chedema Designate COVID Hospital aser Meriema Quarantine Centre semdang.
Maneni April 1 nü parnoki CHC Chibobouzo, CHC Tseminyu, PHC Chunglika aser Tuophema nung Quarantine Facility semdang.
Ano April 6 nü team-i PHC Jotsoma, PHC Khonoma, PHC Mezoma aser PHC Zubza semdanga liasü.