Kohima DM-i mamshiba overhead cables & pipes tem agientsü tuyur

Dimapur, Mongputeni/Oct. 30 (TYO): Jila nung menüngdakba osettsüset tem agientsü aser nüburtem lendong timtem balala nungi kumzüka ayutsü mechi Kohima District Magistrate, B. Henok Buchem-i district nung menüngdakba aser mamshiba overhead infrastructure ajunga tangsa agientsü totuyuba tesashi ka agütsüogo.

Telecom companies, internet service agütsür, cable TV operators aser water supply agencies nem October 29, 2026 nü totuyuba agütsüba ya tekumdangtsü tatembang asütsü ta shia parnok indang utility lines mürektsü mesüra temerenshi alitsü ta ashi.

Taoba küm November 21 nüa iba ama totuyuba agüja liasü aser iba totuyuba maneni nenshia ozüng tesashiba ya agütsü. Mezüng totuyuba agütsüba nungbo mamshiba, senzüka yutsüba overhead cables aser pipes ajunga agientsü, tang tamshidak overhead lines tem technical standards agi melaba ama tejung kuma alena ayutsü shia liasü.

Nüburtem kumzüka ayutsü, yimti tebour jungdaktsütsü aser urban infrastructure yimya shidak nung ayutsü asoshi item totuyuba ya tongtipang lir, ta ashi.

District Magistrate-isa iba dak alia tekumdangtsü balaka magütsütsü ta jangja-jangja metetdaktsüogo. Standard technical guidelines sülen manidakba cables mesüra pipes tem ketdangsüri agizüktsü aser iba maparen inyakba nung senotsü indokba ajunga aibelenba company mesüra agency ajanga menoktsü, ta ashi.

Service nung timtem majurutsü aser senotsü senchi machitsü mechi Kohima District nung aliba service agütsür ajunga dang iba totuyuba nung aliba ama tangsa inyaktsü metetdaktsür, ta sangdong ajangasa ashi.