Kohima DPDB pur küm tatem sentong ka agi

Kohima DC &  DPDB nung mendenbuba yariba Rovilatuo Mor, IAS aser Kohima Village Council nung mendenbuba, Medoselhou Keretsü nati anir tanü Mongolbar nü  Medical College site, Phriebazü, P. Khel Kohima nung küm tatem pelatepa amongba sentong ka ayongzüka amongba mapang agiba noksa ka yangi angur. 

Kohima, Nov. 15 (TYO) : Kohima District Planning & Development Board purtem küm tema aruba tenüng nung telongjem sentong ka tanü Monglbar nü Medical College site, Phriebazü, P. Khel. Kohima Village nung pelatepa mongogo.
Iba sentong nung Deputy Commissioner & Vice Chairman , DPDB Kohima, Wb.R.Mor-i tajungshi o tatsüka jembidang, DPDB ya District Officer ajak atema shisalemsateptsü aser angazüktsü sabang tajung ka lir, anungji ajaki shilem tajung agitsüla ta metetdaktsü. Iba ama senden nung department shiai pei department-i inyaktetba aser inyaktsü bilema aliba sentongtem indang ashidang tangartema temoatsü angur aser iba jagi pei mapa nung tali temulung tagütsüba inyaktsüsa ajungshir ta paisa ashi.
Paisa “Ward Adoption Committees” purtemi nübortem tajangzük angutsüsa kanga temulung agüja inyakba atema pelaba metetdaktsü.
Kohima ya moko machiba yimti ta sangdonga alinungji, ibaji mapa küma inyaktettsü asoshi nübortem dang Kohima nung nisungtem oli aruli asüdak aser nübortem aliba tesem kecha nunga moko machitsü asoshi akok tashi nübortem nem tangatetba agütsütsü nüngdaker ta paisa ashi.
Kohima DC-isa Kohima nung light meyaka atsüktsü asoshi kibong shia dang LED bulb atsüktsü atema tangatetba agütsütsü asoshi mepishia metetdaktsü.
Ano, paisa ashiba agi, Medical College yanglutsü asoshi ali mekazüka aliba ya 95% bo ali kiburtem den jembia renemogo aser joko yakta mapa küma inyak tenzüktsü imlar.
Iba kasa sentong nung Kohima Village Council nung mendenbuba, Medoselhou Keretsü aser P. Khel, Kohima Village nung mendenbuba Kruyie Pienyü natia jembia liasü.
Iba sentong nung menden Additional Deputy Commissioner, Lithrongla Tongpi liasü. Iba kasa anogo nungsa DPDB November senden mena liasü.