Kohima DPDB senden nung onük aika nung o lemtep

Kohima, February 15 (TYO): Ita shia amenba Kohima District Planning & Development Board senden tanü DPDB indang Conference Hall, Kohima nung menogo; iba senden ya Kohima Deputy Commissioner aser Vice Chairman DPDB Kohima, Gregory Thejawelie, NCS leniba nung amen, ta ketdangsertem osang ka ajanga metetdaktsü.
Taoba senden nung lemtetba onüktem reprangshi aser Aspirational Block shimtsü atema o lemtep; iba mapang nung DC-i züngsemtem dang, district shia nung aspirational block kaka dang shimtsü atema cabinet-i telemtetba agiba indang metetdakja liasü.
Board züngsemtemi iba onük nung o lemtepdang RD Department-i Kohima district atema aspirational block ji Tseminyu block shimtsü atema benok, iba sülen züngsemtemi iba atemaji sorkar matsüngdang benoktsü atema lemtet.
Senden nung Nagaland State Legal Services Authority (NSLSA)-i tang tagidak Mega Legal Service Camp indang metetdaktsü; iba camp ya Longleng district nung tenzükba sülen tanga district 10 nunga ayimjema agia February 23 nü Kohima nung iba camp tembangtsü.
Project Coordinator, NLSA Limasenla Longkumer-i, iba camp ayonga akaba tongti nükjidongji mapang shidak nung service balala agutsütettsü atema lir, ta metetdaktsü.
Iba camp mapang nung nüburtemi sorkar departments den sendakteptsü atema maongka angutsü aser sorkar indang welfare programs/schemes aika metettsü, ta shia lai tim departments dang amalitepa inyaktsü aser yaritepba ajanga iba camp takok angutsü mepishia metetdaktsü.
Laisa, Legal Service Authority booths ajanga form fill up asüba aser affidavit draft asüba nung legal teyari agutsütsü; booths balala nung volunteers-i teintet sensotem, matamabensartem aser anogo shia aayangertem sorkari sponsor asüba benefits aser schemes nung register asüba nung yariteptsü, ta metetdaktsü.
Senden nung Village Adoption Committee mapatem reprangshi, aser iba mapang nung committee balalai parnoki inyaka aruba osangtem metetdaktsü.
ADC Kohima aser Core Committee Convenor, Lithrongla Tongpi Rutsa-i committee balala dang tekaraba nung asalentong yanglua mapang atakteter parnok maparen tembanga inyaktsü mepishia metetdaktsü.
Laisa DPDB züngsemtem dang February 25-26 anogotem nung Kohima Local ground nung aser February 27, 2019 nü Touphema nung ayongzükba Mini Hornbill Sekrenyi Festival nung shilem agitsü mepishia metetdaktsü.
Departmental osang metetdaktsüdang Executive Engineer South Division, PWD (R&B) Kohima, Er. Vizotuo Seletsu-i SRDP 2017-2018, PMGSY kübok inyakba project balala, State Plan kübok annual maintenance 2018-2019, Centrally sponsored Scheme aser Kohima nung gari lenmang terenlok indang osangtem metetdakja liasü.