Kohima DTF COVID-19 senden amen

Dimapur, Metsüremi/March 31 (TYO): Kohima District Task Force on COVID-19 pur senden ka March 30, 2020 nü Kohima Deputy Commissioner indang office chamber nung mena liasü.
DC & Chairman Kohima District DTF, Gregory Thejawelie NCS ajanga senden nung jembiba mapang, quarantine center aser COVID-19 Hospital ajak nung coronavirus nungi kümzüka alitsü asoshi jelia mera agitsü aliba ajak agiogo, ta metetdaktsü.
Kohima nung COVID-19 tensa asadangtsü asoshi shimtetba Legislator In-charge, Minister Housing, Tongpang Ozukum aser Advisor Urban Development and Municipal Affairs, Dr. Neikiesalie Kire aser DTF team ajanga March 28, 2020 nü Inter-state Khuzama check gate, TB Hospital Khuzama, Meriema nung aliba quarantine center, Chedema Ayush Hospital aser NHAK nung COVID-19 Treatment Center semdanga district nung COVID-19 den raratsü asoshi lemzükja aliba tesemtem nung renema aliba ngua temulung asüba shia liasü, ta DC Kohoma-i senden nung metetdaktsü.
Iba dak alaka linük tesem ajunga shibangba anogo nungi nüburtem aser garitem senzüsembongba nokdangtsü asoshi district administration den police temi arrsanga inyakdar, saka nüburtemia pei shilem agia sorkari totuyuba agütsüba sülen akhang akhanga anidaktsüla, ta DC-i ashi.
Paisa ashiba agi, Kohima Municipal Council ajanga lenla ajak nung yariteper aser jila nung mozü akhar aser parnokisa ward aser colony nunga mesen tepsetba mozü akhar.
Deputy CMO Kohima, Dr. Hoito Chishi-ia senden nung jembiba mapang Kohima district nung COVID-19 tashidak putetra kechi inyaktsü, ta asüba onük lemsatepa liasü. Pai ashiba agi, iba tashidak aliba tejangja putetertem ya Isolation Hospital (Chedema/NHAK) nung shimteta aliba ambulance ajanga bener oa anepalutsü.
Azüngteta aliba tesem aser ki-o-jen ya Block tem indang SMO/MO aser parnok indang BPM/BAC team ajanga mita reprangtsü aser iba tashidak putetba tesem nung mesüktepa shirang-shikurtem ajak anogo 14 pai kidang quarantine asütsü, ta Dr. Hoito-i ashi.
Iba senden nungsa sub-divisional level nung nüngdakba osettsüset indang asadanga area administrative officer tem dang iba maparen atema KMC den osang-ola agiteptsü ashi.
Iba senden nungsa Medical Officer aser medical staff tem pei aliba station nung 24×7 alitsüla, ta jembi. Maneni anogoshi aayangertem asadangtsü asoshi area administrative officer nem mapa lemzüktsü.