Kohima DTF-i COVID-19 dak sendakba sentong ka ayongzüka agi

CMO Kohima, Dr. Vezokholu Theyo-i July 19 nü Kohima Village Council Hall nung sentepa alirtem den o jembiba mapang tangokba noksa nung angur.

Dimapur, Chiteni/July 19 (TYO): COVID-19, Kohima District Task Force (DTF)-i July 19 nü Kohima Village Council Hall nung Kohima, Chedema, Chedema Model, Tsabazou, Kijümetouma, Kijümetou Basa, Rüsoma aser Dihoma yimtsüngtem atema COVID tashidak tendangba aser vaccine agiba dak sendakba nung tangazükba agütsütsü atema sentong ka ayongzüka katsüogo.

Sentong nung o jembiba mapang minister in-charge, Tongpang Ozukum Minister for PWD (Mechanical & Housing)-i wara den raraba mapang sorkar aser district administration den teka amteper inyaktsü atema North Angami Public Organisation (NAPO)-i telemtetba agiba atema parnok dang kanga pelaba lemsatep.

State nung COVID-19 tensa indang metetdaktsüba mapang Ozukum-i, Northeast nung tanga state tem den medemdangra, tashidak tendangba aser vaccine agiba dak sendakba nung Nagaland ya tekübokba jenjang nung tanabuba lir saka tasüba rate bo timba lir, ta ashi. Paisa, monor mozüki bushiba aser kidang temang anepaluba ajanga tashidak agi nisung aika asür ta shia, pai yimdaklirtem dang memeimshi tashidak tendangtsü aser tema anepalutsü ayongzük, ajita asünungdang tashidak tali menatepyonga mao tsüngda nokdangtettsü, ta ashi. “Asenok kümzüka lira asenoki aser kibong aser lokti kümzüktettsü. Vaccine dak sendakba nung olulu osang prokshiba dak tamang makatsüla aser sorkari teyuba ama SOP sülen mapa ajak nung tashi angaa anidaktsü nüngdaker,” ta pai ashi.

Minister-isa, Kohima district kübok lokti tentettem teyari nung district administration, tasembuba wave atema tajungba renemer alitsü imlaba lemsatep, kechiyong sorkar kijai wara den raratsü tamakoktsü. “Kohima-i tatishitsü sayutsü mapang lir. Shisahirtem sentepa aliba tesem aser Naga nunger rongnung tejakleni orr aliba district ka ama asenoki vaccine agiba nung süang, sorkari COVID-19 dak sendakba nung tetuyuba agütsür aliba sülen tashi angaa anidakba nung süang, item ajak nung tangar dang lenmang sayautsüla,” ta pai ashi.

Sentong nungsa Urban Development and Municipal Affairs Advisor, Dr. Neikiesalie Nicky Kire-i o jembiba mapang, sentepa alirtem dang covid dak sendakba yimyayimpongtem shisaa kaa anidaktsü kodang tongtibang iba indang lemsatepba den mask asemtsüba, merekmejua alitsü aser lokti nung tetsüngda ita inyaksangshitsü nenshia metetdaktsü. Paisa, tekaratiba nung temang anepalutsü aser nüburtem kümzüka toktsütsü atema tashidak menaba meimshia malitsü ajungshi. Dr. Nicky-isa, khuret angatetba senso tajung ka ama wara nung lokti kümzüka toktsütsü atema vaccine agitsü aser tashidak mapang shidak nung tendangtsü ayongzük.

Kasa mapang nung Technical Education & Election, Advisor Medo Yhokha-i, yimtsüng lenirtem aser lokti tentettem dang tarutsü nung pei lokti kümzüka ayutsü atema covid inyakyim benoka inyakba nung teka amteper inyaktsü mepeshia metetdaktsü.

DC & Chairman DTF Kohima, Gregory Thejawelie, NCS-ia, lokti aser tarutsü putu kümzüka toktsütsü atema nisung ajaki pei shilem agitsü ayongzükba den Epidemic Disease Act 1897 aser IPC Section 188 dak rangloker jembi. Item temzüng ozüng dak ajemdaker sorkar tetuyuba sülen manidakertem nem tapet temerenshitsü agütsütsü akok, ta pai ashi.

Maneni CMO Kohima, Dr. Vezokholu Theyo-i, July 18 nü tashi nung Kohima district nung nisung 1,79,486 nem vaccine agütsüogo, aser item nisungtem rongnung 1,05,706 mezüngbuba aser tanabuba dose agiogo aser nisung 88532  mezüngbuba dose agiogo ta metetdaktsü.

CMO-isa, covid dak sendakba yimyayimpong shidak benshitsü, mapang shidak nung tashidak tendangtsü aser tashidak menar alir mesenmetui amshiba nungi pilaa alitsü aser mapang shidak nung vaccine agitsü ajungshi..

Sentong nungsa Northern Angami Public Organisation tir Zeneituo Yano-i, iba tesem nung aliba nüburtem atema sentong tajung ayongzüka katsüba atema Kohima DTF dang kanga pelaba lemsatep. Paisa, iba sentong agiba ajanga nüburtem arendaka aliba aser ken o mejangjai alibatem jangjashitsütsü imlaba lemsatep, aser tarutsü nunga NAPO-i DTF nem takokba tashi teyari agütsütsü nangzük.

Iba sentong ya SDO (C) Sadar Kohima, R. Daniel Angami NCS lenisüba nung agi aser paisa tepela anküp o jembia liasü. NAPO, NASU, NAYO, NAWO, AYO aser yimtsüng balala nungi Village Council, Village Task Force, tetsür lokti tentet nungi züngsem asemsemi iba sentong nung shilem agia liasü.