Kohima DTF-i plastics mita ao

Kohima, November 15 (TYO): November 15, 2019 nü single-use plastic nokdangba Kohima District Task Force-i tang agi tanabubaren Kohima jila tesem ajaklen single use plastics mita oa aika puogo, ta ketdangsertem osang ajanga metetdaktsü.
Task force nung züngsemtemji district administration den tanga departments aser melungtet teloktep nungi züngsemtem lir, aser Kohima jurisdiction nung single use plastic products ajak meshimeshi nokdangtsü nükjidong nung parnoki plastic bags, mineral water bottles (2 ltrs teküok), Styrofoam cups den plates, plastic cups, forks aser spoons den tanga single use non-biodegradable plastic products mita ao aser aika puogo.
Task Force züngsemtemji team pongu küma lemsar parnoki tesem balala mita ao aser Iba mapang nung public organizations aikati yaritepa liasü.
Dokan aika nung nokdanga aliba single-use plastic products ayokba putet. Aiabelener dokan kiburtem dang senchi achi aser tarutsü nung maneni aiabelenra trade licenses thinentsütsü, ta tekümdangtsü metetdaktsü.
Nokdangba plasticsdji indoktsü atema Task Force team-i bendena liasü.
Nagaland state sorkari Nagaland ya plastic free state ka kümdaktsütsü atema kanga meranga inyakba nung Kohima District Task Force-ia single use plastics nokdangba maparen nung kanga meranga inyakba ajanga jila nung non-biodegradable plastic waste aika ajema akümba dang masü saka state yimtiba, Kohima temerükba kümdar, ta kasa osang ajanga metetdaktsü.