Kohima DTF-i ‘single use plastics’ mita ao

Dimapur, March 13 (TYO): March 13, 2020 nü Kohima District Task Force (DTF)-i Kohima nung ‘single use plastics’ mapa küma inyaktsü atema tan agi pezübenbuba mita ogo.
Kohima DTF-i mapang shia mita aoer aser tanü NGOs aser sorkar Department balalai yaria iba mapa inyakdang Kohima jila nung dokan ajak sema ao.
Iba mapang dokan aika nung ‘banned plastic bags’ amshiba apu aser ano litre ka teküpok minerals water bottles ayokba putet. Iba atema dokan kiburtem dang senchi achi aser parnok ket nung aliba platics apu.
Kohima DTF-i maneni tarutsü nunga iba mapa inyaktsü aser ‘plastic pollution’ anema raraba takok angutsü merangtsü ta osang metetdaktsü.
Kohima District Administration-i iba mapa nung yaritepab telok balala, Kohima Municipal Council aser sorkar department tem dang pelaba metetdaktsüogo.