Kohima Football League-2: New Market aser Ziekezou na point lemsatep

Kohima, Luroi/August 17 (TYO): Kohima Local Ground nung tanü Rogonü/Friday Kohima Football League 2buba edition asayamung indang second leg asaya nung taoba asayamung nungi jenjang temaba nung takok angur, Ziekezou Sporting Club aser runners-up New Market Football Club team tsüngda point ka ka lema liasü.
Tang jenjang tanabuba aser tasembuba nung aliba team ana tsüngda asaya tenzükli nungi kanga dang toktetpa asaya liasü. Minute 9buba nung New Market telok nungi asayar Kethozhapu Meru (30) ajanga metsüoktsüba ball Gideon Leo (99)-i agizüka pai par telok atema mezüngbuba goal idaktsü.
Minute19buba nung New Market nungi goal keeper Sedekhotuo Sote (21)-i saisapong dak mapetba yimya benshia box telung nung asayar Leo alangdaktsüba ajanga penalty ka menasem. Iba penalty ya New Market nungi asayar Salu Kulim (14)-i par telok atema tanabuba goal idakja liasü.
Ajisüaka, taoba asayamung nung takok angur Ziekezou Sporting Club-i minute 23 buba nung maongka tajung ngua asayar Keneinguzei Pienyü (9)-i metsüloktsüba ball Vilhoubeituo Yhome (15)-i agizüka pai Ziekezou atema mezüngbuba goal idaktsü.
Goal idaktsür minute pezü sülen Yhome-isa D’box telung nungi goal ka idaktsütsü atema maongka angu saka pai ball tezülen metsüdok.
Minute 36buba nung New Market nungi goalkeeper Sedevituo Seretsu (1)-i Punürü Nienu (10) ajanga kanga dang sashia metsüloktsüba ball menokdangtetba ajanga first half tashi nung telok ana tsungda 2-2 nung tembang.
Lemon break sülen minute 62 buba nung Ziekezou nungi asayar Khriekethozo Keretsü (23)-i metsüloktsüba ball Yhome (15)-i kanga dang junga tekolak agi goal tasembuba idaktsü. Ajisüaka, minute 72 buba New Market nungi asayar Leo-i par telok atema goal tasembuba idaktsüba ajanga telok ana tsüngda goal 3-3 kümadok.
Goal 3-3 ngur telok ana tsüngda ano goal idaktsütsü maongka atema meranga asayaba mapang minute 76 buba nung Yhome-i ball metsüloktsü, saka pai kanga indanga metsüba ajanga goal keeper-i nokdangtet. Minute 86 buba nung New Market-i goal ka idaktsütsü atema asayar Kulim-i Leo nem ball metsüloktsü saka Leo anasa ball metongteti tanga teloki rakzükadok.
Iba asaya nung telok ana tsüngda draw asuba ajanga tang Ziekezou Sporting Club point 21 ngutetta jenjang temaba nung aser New Market teloki point 19 ngutetta jenjang tasembuba nungang lir.
Luroi/August 18 atema asaya yamai alitsü:
1. Sechü-Zubza FC vs Khriekesa FC nikongdang 2:00 ako
2. Late Xavier Rutsa Memorial Exhibition match Kohima Press Club aser Kohima Town Club nikongdang 4:00 ako.