Kohima Football League-2; Sechü-Zubza-i tanü asaya kokogo

Kohima, Luroi/August 3 (TYO): Tang tasayadak Kohima Football League-2 nung Sechü-Zubza Football Club pur khen dang tamakok mongui asayaa arudar aser round trokbuba asayaa parnoki kokogo.
Tanü asaya nung league toppers Sechü-Zubza aser United 16 FC Lerie na asaya Sechü puri makoktsü amia liasü, kechiyong asaya mezüngbuba shilem tembangba tashi nung goal 1-2 agi United 16 pur tejakdang liasü.
Ajisüaka asaya tembangba tashinungbo Sechü-Zubza puri 4-3 agi akok.
Asaya nung mezüngbuba goal Sechü-Zubza nungi asayar Noune Medoze (21)-i minute 29buba nung idaktsü, saka minute 43buba nung United puri Longkhoi (7) ajanga goal ka idaktsü aser maneni parnokisa mapang apuloktsür asayaba mapang nung Temjen Meren (78) ajanga tanabuba goal idaktsü.
Break sülen Longkhoi-i maneni minute 72buba nung United 16 atema tasembuba goal idaktsü.
Ajisüaka Sechü Zubza puri kanga meranga asayaa Petevizo Kezieo (7) ajanga par telok asoshi minute 77buba nung goal tanabuba idaktsü aser iba sülen Kekhrieletuo Tsira (11)-i minute 87buba nung penalty ka ajanga goal tasembuba idakja score kasasa aküm. Atakzüker asayaba mapang tembangba sülen mapang apuloktsür asayaba mapang nung Sechü-Zubza nungi asayar Petevizo Kezieo-i par telok asoshi goal pezübuba idakja parnoki asaya kokogo. Iba asaya akokba sülen parnoki tang tashi nung point 24 nguteta maneni temaba jenjang nung lir.
Asaya nung United 16 FC nungi asayar Menguneizo Peseyie (17) aser Manyong (12) na nem yellow card kaka agüja liasü.
Tanü asaya nung NDPP General Secretary, Prasielie Pienyü tetushi tesemdanger ama arua aden.
Luroi/August 4 nü asaya yamai alitsü:
1. Vanguard FC Tseminyu Vs Khriekesa FC Meriema at 12:00 noon
2. Twenty XI FC Viswema Vs New Market FC at 2:00 pm