Kohima Football League-2: Ziekezou SC-i United 16 kokogo

Kohima, Luroi/August 24 (TYO): Kohima Football League-i ayongzüka Kohima Local Ground nung tang tesayidak aliba Kohima Football League tanabuba edition asayamung nung jenjang temaba tongtettsü atema taoba mapang takok angur Ziekezou Sporting Club-i Rogonü/Friday United 16 telok madak takok nguogo.
Tatembangbuba (12) round asaya nung Ziekezou SC-i United 16 telok madak goal 7-1 agi takok anguba ajanga par teloki point 24 ngua iba season nung temaba jenjang tongtetogo. Ajisüaka, Ziekezou SC indang final position jibo tanü Küptoknü Sechü-Zubza FC aser Twenty-XI FC Viswema na tsüngda asayaba sülen metettsü, koba KFL-2 asaya tatembangbuba asütsü.
Tang tashi asaya aruba nung Sechü-Zubza teloki point 23 ngutetta lir aser tanü final asaya nung par teloki akok mesüra draw asüyonga parnoki iba season nung takoker jenjang ngutettsü. Ajisüaka, iba asaya nung Sechü-Zubza teloki tamakok ngura Ziekezou Sporting Club-i ano tanaben atonga KFL takok marok angutsü.
Ano külen, iba asayamung nung jenjang pezübuba nung alir telok, Twenty-XI FC-i asaya koktet nungbo par telok jenjang tasembubai atutsü.
Rogonü/Friday asaya nung Ziekezou nungi asayar Keviphretuo Kire-i minute 5buba nung mezüngbuba goal idaktsü; Minute 9buba nung Keneinguzei Pienyü-i tanabuba goal, minute 30buba nung Neikethozo Yhome-i goal tasembuba aser half-time atongtsü anasa Vilhoubeituo Yhome-i par telok atema goal pezübuba idakja 4-0 nung tembang.
Lemon break sülen, minute 62buba nung Ziekezou telok nungi asayar Keneinguzei Pienyü-i goal pungububa aser minute 70buba nung asayar Khriekethozo Keretsü-i goal trokbuba idakja 6-0 agi Ziekezou telok tejakdang liasü. Ajisüaka, minute 85buba nung United 16 nungi asayar Longkhoi-i par telok atema goal ka idaktsü. Ano minute 89buba nung Ziekezou nungi asayar Kethosilie Zatsu-i goal tenet buba indakja 7-1 nung asaya tembang.
Telok ana tsüngda asayaba mapang asayar yimya shitak mamshiba ajanga Ziekiezou SC nungi Keviphretuo Kire nem yellow card agütsü.
KFL-2 asayamung shibangba sentong ya tanü asaya tembanger sülen akatsü ta, Kohima Town Club-i metetdaktsü. Sempet agütsüba sentong nung Nagaland Contractors & Suppliers Union, Tir, Pele Khezhie tetushi tesemdanger asütsü. Kasa sentong nungsa Taekwondo demonstration aser 4th NAP Jazz band temi shilem agitsü.
Luroi/August 25 nü atema asaya yamai alitsü:
Sechü-Zubza FC vs Twenty XI FC nikongdang 2:00 ako nungi.