Kohima Hornbills aser Valour CC SF tongogo

Kohima, Metsüremi 31 (TYO): Jakhama Local Ground nung Nepali Baptist Church Kohima Lanurtemi ayongzükba 9buba Silver Cup T-20 Cricket asayamung nung Kohima Hornbills aser Valour Cricket Club semi-final tongtetogo.
Iba asayamung tasembuba quarter-final asaya nung Kohima Hornbills team puri wicket 6 agi Woodland Cricket Club madak takok ngua tsükdaktsüogo.
Iba asaya nung Woodland CC teloki toss koka mezüng batting asütsü shima liasü saka tatem tonga masayatetti over 16.5 nung run 88 dang yanglur ajak out sümadok.
Woodland CC nungi asayar Merenbai run (19) timba yanglutetta liasü. Kasa asaya nung Hornbills nungi asayar Dieto-i wicket asem out sütsü aser pa den yariserma Moa aser Tali nati wicket ana-na agi.
Tanabuba inning nung Hornbills team-i kanga junga asaya tenzük. Asayar Heiketo-i run 47 aser Moabai run 21 yanglutet. Tenati shilem tajung agiba ajanga par team-i wicket 6 agi takok ngua semi-final tongtetogo. Woodland nungi asayar Sepichem-i wicket ana out süja liasü.
Iba asaya nung ‘Man of the Match’ Heiketo nem agütsü.
Kasa asayamung tatembangbuba quarter-final asaya tanga ka nung Valour CC team-i Bokajan CC team madak run 1 agi takok ngua semi-final tongtetogo.
Valour team-i toss koka mezüng batting asütsü shim. Iba asaya nung par teloki over 20 nung wicket 9 out sür run 85 dang yanglutet. Asayar Bashir-i run (15) timba yanglua liasü. Bokajan nungi asayar Babu Deka-i wicket asem out sütsü aser pa den yarisema Siddharth Choubey aser Siddharth Bey nati wicket anana out sütsü.
Ajisüaka, tanabuba inning nung meimlai ka Valour team-i kanga junga asaya. Over 19.5 nung Bokajan team pur ajak out asü tashi nung run 83 dang yanglutet. Bokajan nungi asayar Amit-i run (19) timba yanglutet. Kasa asaya nung Valour nungi asayar Anil-i wicket asem out sütsü aser pa den yarisema Bashir aser Bittu nati wicket ana-na out sütsü. Iba asaya nung Anil Sharma-i over 1.5 nungi wicket asem agiba atema pa nem ‘Man of the Match’ award agütsü.

Rongchii (April) 2 nü Semi-final asaya yamai alitsü:
Esa Warriors vs Valour CC @ 8:30AM
Diphu XI vs Kohima Hornbills @ 12:00 noon