Kohima Inter Ward Solo tetoktepba osang

Dimapur, December 10 (TYO): 16buba Hornbill Festival 2015 den sentaktepa Association Kohima Municipal ward Panchayat-i ayongba Kohima Inter Municipal ward solo tentepba mezüng session nung final round December 9 nü kaogo; Iba sentong nung Indian Oil AOD Guwahati nung Executive Director, Dipakankar Ray tetushi tejaokersüa liasü.

Sentong tenzüka Ame-u Usou Zao aser choir temi ken ka aten.

Iba tetoktepba sentong lapoktsüdang Minister for Social Welfare, Kiyanelie Peseyie-i, Hornbill benjung ya kanga nüngtugu kümogo aser iba benjung ya Naga nunger sobaliba aser libaliro sayatsü asoshi sabang tajung lir, ta ashi.

Iba tetoktepba Hospital colony nungi contestant No.10, Besuto Neinu-i takok ngua certificate den senpet sen 50,000 agizük. P.R Hill nungi contestant No.12 Vikali Ayemi-i tanabuba jenjang nung takok ngua senpet sen 30,000 agizük.Tasembuba jenjang nung takok angur, Agri Farm/Forest nungi contestant No.26 Imnawapang Tsudir-i senpet sen 20,000 agizük aser pezübuba jenjang nung takok angur, High School colony nungi contestant no 6, Sevi-u Khruomo-i senpet sen 10,000 agizük. Iba den külemi Final round atonger ajak nem tayongeri certificate den senpet sen 3,000 agüja liasü.

Iba sentong nung tetendangertemji Bambi Kevichusa, Khyochano TCK Lotha, Neisenuo Apon Rengma, James Basnet aser Ame-u Usou Zao nunger liasü.

Sentong nung Chief Patron Minister for Environment, Forest & Climate Change, Dr. Nicky liasü aser Parliamentary Secretary for YRS, Lottery & MTF Khriehu Liezietsu aser MLA Vikho Yhoshu patron liasü.

Iba sentong nung Fusion Flippers, Elemenz aser ‘Faith in Action’ tsüngsanger teloktemia shilem tajung agi.

Iba tetoktepba nung tanutsütilaji LFHSS nung class asem nung azünger arishi küm 8, Thejano Ethel Kira liasü aser sentong nung shilem agir ajaki Khristmas ken-a ka ka tena liasü. Sentong tembanga Naga Orpheus takok angusang Kokliba-i ken ka aten.