Kohima kübok tesem aika nung anentsüh agi timtemer

Kohima, July 4 (TYO) : Tesüiba anogo ishika Kohima nung tzünglu kanga aruba ajanga tesem aika nung anentsüh alua lir aser ano National Highway-29 o 2 kübok tesem kar anenoka aiba ajanga senzüsenbongertemi lendong ajurutsü ana nung dang lir.
Kohima nungi Dimapur, NH-29 lenmang nung Naga Hospital o Para Medical tsünglanglen, KMC dumping site tejenba anasa aser Dzüdza Bridge anasa ali anenoka ia lir aser item tesem nung lendong ataloktsü akok ta khuret süa bilemer.
Ano, NH-2 (Kohima-Imphal road) nung Phesama village anasa anentsüh aluba tesem nung gari lenmang temalen nungi ali anenzüka alur.
BRTF züngsemtemi Naga Hospital Kohima, Para Medical aser Phesama dena tesem aika nung lenmang lapokba mapa inyakdar aser anentsüh aluaka tang tashibo iba lenmang nung garitem tetsükdaktsü melii senzüdar.
Ano külen, NH-29 nung anentsüh aluba ajanga Kohima aser Dimapur tsüngda senzürtemi timtem ajurur. Iba lenmang nung garitem kanga meilongi senzüba ajanga tanü TCP gate nungi bypass police check gate aser NHK junction nungi Tinpatti tashi traffic jam liasü.
Phek district nunga Losami junction nungi Phek district headquarters tashi gari lenmang nung anentsüh aluba ajanga timtem ajurur aser ibaji janga Lanye adena senzütsüsa akümer.

You must be logged in to post a comment Login