Kohima Law College Evangelical Union Fresher’s Day mungogo

Kohima, Tsüklai/February 28, 2021 (TYO): Hokolbarnü, (26.02.2021) Kohima Law College Evangelical Union indang Freshers’ Day munogo.
“Transformed students impacting the campuses and the Nation as the disciples of the Lord Jesus Christ” nung ajemdaker Kohima Law College indang Evangelical Union Freshers’ Day ayongzük. Tan academic küm nung freshers 65 (LL.B Ist Semester) dak tema lir aser iba anogomung nüngtem nung freshers ajak nem sempet lema agütsü.
Iba sentong nung Ekyarhoni-i anir praise 8 worship team-i ken aten aser Khumeng o Soreni nati Tejen aser Tasen Lai nungi Tsüngrem O azüng.
KLCEU Executive temi ken ka aten. KLCEU President Pheniang Lushing-i telok pela agizük. Iba sentong tenzüka Ayeng-i sarasadem aser sentong tembanga Abang-i sarasademtsü.
Asst. Professor Kezhokhoto Savi-i, College azüngba mapang Evangelical Union nung yakyaka shilem agiba ajanga tajangzük den tepela anguba aser iba den külemi aier – asangur tem Khristan taküm ka ka ama alitsü asoshi tanela nung temelenshi adokdaktsüba indang lemsatep.
Savi-i, pa Patkai Christian College nung graduation mapang Patkai Christian College Evangelical Union nung züngsem ka ama inyakdang tajangzük angubatem telok den lemsatepa liasü.
Kasa sentong nung Freshers kari parnok graduate asüba college nung E.U maparen tsütsü ajangshibatem lemsatep. Asst. Professor Moasenla, shiba KLCEU indang teacher-in-charge lir, lai freshers atema sarasademtsü.
Maneni, iba sentong nung Asst. Professor Soni Magh o jembir liasü. Lai Lipok kaket nungi Yoseph taküm otsü nung ajemdaker jembi. Iba den külemi Soni-i 1Tim 4:12 nung ajemdaker kaketshirtem ajungshia liasü. Iba sentong temer sülen süngojemba mapang agi, ta sangdong ka ajanga metetdaktsü.