Kohima Law College team anati awareness sentong katsü

Kohima, August 06, 2017: August 05, 2017 nü KLC team ana lemsar team kati Chakhesang Baptist Church, Kohima Conference hall nung ‘Civil Rights & Duties’ Awareness agidang tangokba noksa nung angur, aser tanabuba team-i Rengma Baptist Church nung Youth Week Program agidang tangokba noksa nung angur. Kasa noksa nungsa professor-in-charge, Kezhokhoto Savi-a angur. 

Kohima, August 06 (TYO): August 5, 2017 nü Kohima Law College final year LL.B kaketshirtem team anati conference hall, Chakhesang Baptist Church, Kohima nung Citizen Rights & Duties awareness sentong aser Rengma Baptist Church nung Youth Week Program nung shilem agia liasü.
Professor-in-Charge, Kezhokhoto Savi leniba nung Kohima Law College-i item sentongtem nung Consumer Rights, Food Safety & Standard Act, Clean Election, Public Service Delivery, National Food Security Act, Lokayukta, Environment, RTI, Human Rights aser Medical negligence onüktem nung jembia liasü.
Züngsem balalai onük aika nung jembiaka parnoki tongtibangsüa ‘Clean Election Campaign’ nung jembia liasü. Iba dak sendakba nung NVCO Tir, Kezhokhoto Savi leniba nung züngsemtemi, “Onoki ochi jembitsü, onoki ochi atema raratsü, ochi atema nokdaktsü aser asen lokti nung temelenshi tajung bener arutsütsü,” ta tenangzükba agia liasü.
Kezhokhoto Savi-i, “Asenok democratic state ka nung alir, aser election tetezü asen state anitsü atema tim lenir shimba lir. Lokti ka nung terenlok yimjung aser azükaru atema yimsüsüba tajung nüngdaker,” ta ashi.
“Khristian tangatetbatem nung sen atema mesüra tajangzük atema vote agütsüba tetetzü vote ayokba lir, aser ibaji Khristian tangatetba anema tamajungtiba lir, iba den külemi Election Code of Conduct alema ozüng anema inyaker asütsü,” ta paisa ashi.
“Taoba state general election nung sen crore 937 indokogo ta angazükogo, aser ibaji Nagaland otsü nung sen timtiba indokba election liasü, anungji iba ama lepshia meinyaktsüla. Asen ama state tila ka nung sen crore 937 jagi gari lenmang, apu, health sector, shisaliok rejutem, electricity aser public transport ama lenla aika nung terenlok mapa inyakteter lila,” ta pai metetdaktsü.
Kezhokhoto Savi-isa, ‘Clean Election Campaign’ ya tanga kecha masü saka nübur ajak dang ochimashi maparen balala nungi pilar ochishia lenir tajung shimtsü atema tayongzükba lir, ta metetdaktsü.
“Tsüngrem metetba lenirtem shimba ajanga asen lima sentsüwangshitsü. Asenok ajak senteper clean election ya takok ngudaktsüdi, koba ajanga asen state ochimashi maliba state ka akümtsü aser state yangertsü,” ta paisa ayongzük.