Kohima, Mokokchung aser Niuland nung DPDB senden amen

Dimapur, Metsüremi/March 15 (TYO): Kohima District Planning and Development Board ita shia amenba senden March 15, 2024 nü Kohima nung aliba DPDB Hall nung mena liasü.

Iba senden nung Advisor, School Education & SCERT, Dr. Kekhrielhoulie Yhome aser MLA Dr. Tseilhoutuo Rhutso nunger dena liasü.

Deputy Commissioner, Kohima, Kumar Ramnikant-i taoba DPDB senden nung lemtetba tem lepa reprangshia liasü. Iba sülen society balala registration indang jembi aser registration atema society tenet-i asüngdangba nungi pezü magizük, aser Merhü Welfare Society, Medemer Fund Society aser Tamlu Bühü Union Society tem register asütsü atema jembia liasü.

Society ka nung züngsem tenet bosa alitsüla aser kin balala nungi alitsüla, ta Dr. Rhutso-i ashi.

Society registration atema screening process asoshi jembidang Dr. Yhome-i registration maparen tajungba nung inyaktettsü asoshi guidelines aser criteria tejangja kar ayutsü nüngdaker ta ashi.

Kohima district nung gari license aser registration indang osang Regional Transport Officer, Kohima ajanga PowerPoint nung agütsüdang, tang fiscal year atema Learners Licenses 3580 aser Drivers Licenses 2747 agütsüogo ta ashi.

Züngsem temi road safety awareness aser registration maparen tongmelangba akumtsü atema jembia liasü.

Senden nung Divisional Forest Officer, Kohima ajanga Nagaland Forest Management Project aser Self-Help Groups (SHGs) inyakyim indang osang agüja liasü.

Maneni National Clean Air Program aser Kohima nung vertical gardens amenoktsü indanga jembi.

Dr. Kekhrie-i loan junga amshitsü aser mapang shidak nung menoktsü nenshia ashi. Taruba DPDB senden nung Public Health Engineering Department dang Jal Jeevan Mission indang PowerPoint presentation agütsütsü nungloktsü.

Mokokchung District Planning and Development Board ita shia amenba senden March ita asoshi Deputy Commissioner, Mokokchung indang Conference Hall nung March 15, 2024 nü mena liasü. Iba senden ya Deputy Commissioner aser Vice Chairman, DPDB, Thsuvisie Phoji lenisüba kübok agi.

Senden nung PWD (R&B) ajanga department inyaksangshi indang lemsatepdang lenmang tezülen long atsükba ajanga lenmang raksaba aser anentsüh aluba indang tebilemtsü lemsatepa liasü.

Log atsüngba, tatsüktsü süng nangtena ayuba aser sentong junga meyanglui link roads yangluba aser lenmang tezülen terenlok maparen junga meinyakba ajanga lenmang agir, ta ashi.

Iba asoshi Deputy Commissioner-i nokda dener kuli bener arutsü aser timtem bentettsü asoshi mera agitsü ashi. Iba amala maparen meinyaktsü atema tekeraba nung totuyuba ka agütsütsü ta pai ashi.

Department of Urban Development ajanga tang teinyakdak aser tarutsü nung inyaktsü aliba prokect tem indang PowerPoint presentation agütsü. Iba mapang parnoki PM Street Vendor’s Atma Nirbhar Nidhi (PMSVANidhi) Scheme nung terenlok aliba indang ashi, koba ajanga Street Vendors nem Working Capital Loans agütsür. Tang tashinung street vendors 112-i iba scheme nungi teyari agiogo, ta ashi.

Board ajangasa Chuchuyimlang HiEERA Project agizüka tim department dangi nüngdakba mera agitsü asoshi yok.

DC Mokokchung ajangasa Heads of Departments (HoDs) aser employees ajunga dang election mapang pei posting tesem nung alitsü metetdaktsü.

Niuland District Planning and Development Board senden March 15, 2024 nü Deputy Commissioner, Niuland indang Conference Hall nung Deputy Commissioner aser Vice chairman, DPDB Niuland nung Sara S. Jamir lenisüba kübok mena liasü.

Niuland District atema Project Director yoka DRDA office balala amenoktsü, Treasury office amenoktsü, Branch Post Office upgrade asütsü aser Old Showuba nung SBI Bank tali amenoktsü atema iba senden nung jembia liasü.

Khaghaboto (Grey area) nung tekeratiba nung Police outpost ka amenoktsü atema iba senden nung nenshia jembi, kong küm shia nisung tepsetba ama ataloker.

Board ajangasa sorkar dangi district nung department balala 12 amenoktsü asoshi bena liasü.

DC ajangasa district nung aliba ketdangsürtem dang station nung alitsü aser station yutsür aotsüsa süra leave agütsütsü ashi.

Iba senden nung Food and Civil Supplies Departmental nungi ketdangsür temi department inyakyim PowerPoint presentation agüja liasü.