Kohima & Mokokchung nung Intensified Diarrhoea Control Fortnight (IDCF) tenzükogo

July 27, 2015 nü NHAK nung Health & Family Welfare Minister, P. Longon (abelen)-i Intensified Diarrhoea Control Fortnight tenzüktsüdang agiba noksa angur. Achijilen Imkongliba Memorial District Hospital nung Mokokchung DC, Sushil Kumar Patel IAS-i IDCF tenzükba sentong nung o jembiba angur.

Dimapur, July 27 (TYO) : July 27, 2015 nü state yimtiba Kohima nung Health & Family Welfare Minister, P. Longon-i Intensified Diarrhoea Control Fortnight (IDCF) programme tenzüktsü.
Iba sentong nung Mission Director, Dr. Sukhato A. Sema-i IDCF maparen ya July 27 nungi August 8, 2015 tashi inyaktsü ta ashi.
IDCF maparen ya shilem ana lemsar inyaktsü aser mezüngbuba hopta nung diarrhea azüokba dak sendakba mapa inyaktsü aser tanabuba hopta nung Infant & Young Child Feeding practices nung temulung agütsütsü, ta Dr. Sukhato-isa metetdaktsü.
Sentong nung mendenji Commissioner & Secretary, M. Patton IAS liasü aser NHAK medical superintendent, Dr. Neikhrielie Khimea-o-i anküp tepela o jembi.
Hombarnü Mokokchung district atema Intensified Diarrhoea control fortnight (IDCF) tenzükogo.
Deputy Commissioner aser District Health Society Mokokchung chairman, Sushil Kumar Patel, IAS-i Imkongliba Memorial District Hospital nung iba sentong tenzüktsü.
Diarrhoea ajanga tila tanurtem taküm samatsür anungji asenoki iba tashidak kanga junga meteta alitsü tim aser ORS o Zinc ajanga mokokra nüngdakba medical services teyari agitsüla, ta DC Sushil Kumar-i ayongzük.
CMO Mokokchung, Dr. S.S. Akaba Longchar-i o jembidang ashiba agi, Mokokchung district nung ASHAs 184 lir aser tanur arishi küm pungu teküpok aliba kibong shia Asha worker temi semdangtsüla aser ORS packet o Zinc tablet agütsütsüla.
Iba sentong nung mendenji Dr. Limatula Aier DPO (UIP&RCH) Mokokchung liasü aser lai Intensified Diarrhoea control fortnight (IDCF) amungba indang osang metetdaktsü.
Sentong nung Medical Superintendent IMDH Mokokchung, IMDH nungi Medical Officers, Dy. CMO Mokokchung aser CMO o IMDH Mokokchung nungi health officers aden.