Kohima Municipal atema tenüng kata magütsü

Kohima, January 07 (TYO): Metetdakja aliba ama Kohima Town Municipal Council kübok ward 19 atema nomination file asütsü asoshi January 3 nungi January 7, 2017 nü tashi liasü, saka tanü tatembangba anogo nikongdang 3:00 ako tashi nunga candidate shingaia tenüng magütsü.
ADC Kohima aser KMC election atema Returning Officer, Lithrongla Tongpi-i, tejangrar candidate nem nomination forms 31 agütsüogo, saka tanü tatembangbuba anogo tashi nung candidate shingai tenüng magütsü, ta metetdaktsü.
Lai ashiba agi, Kohima tensaji tuluka azüokogo saka candidate tem tenüng agütsütsü atema lokti tentet balala aser molungtet teloktemi nokdanger.
Returning Officer-isa, ward 19 rongnung menden trokbo tetsür candidate tem atema wazükja lir, aser item ward ji- ward 3, 6, 9, 12, 15 aser 18 lir aser tanüngba mendenji tetsür aser tebur naprong atema lapokja lir, ta metetdaktsü.
SDPO North, Puzoto Khatso-i, Police Department-i January 3 nü nungi January 6 nü tashi Mahilla, 10 IR, 9 IR aser Anti-Riot Party nungi security peria lemzükja liasü, aser tatembangbuba anogo nungbo sepai talila lemzükja liasü, ta metetdaktsü.