Kohima: NAC Open Supercross tetoktepba tenzükogo

Kohima kübok Local Ground nung agiba NAC Open Supercross tetoktepba nung bike toktepa anishirtemi shilem agiba noksa ka yangi angur. (Kohima, June 02)

Kohima, June 02 (TYO): Nagaland Adventure Club (NAC)-i ayonger Kohima kübok Local Ground nung tanü, Brehostibar nü nungi tenzüka agiba Open Supercross tetoktepba nung bike toktepa anishir 74 tashi shilem agitsü tenzüka lir.
Nagaland nung tan mezüngsüa ayongba Supercross tetoktepba ya Federation of Motor Sports Clubs of India (FMSCI)-i ketdangsüa agitsü tenzüka lir aser iba tetoktepba nung Nagaland den külemi, Meghalaya, Assam, Mizoram, Haryana, Bengaluru aser Delhi nungi toktepertemi shilem agitsü tenzükogo.
Tan tetoktepba nung shilem agir bike anishir nisung 74 nungi parnok 32-i Novice shilem, 21-i Open shilem, 10-i Local shilem aser 11-i Expert shilem nung tokteptsü tenzüka lir.
Shilem 4 prongla indang qualifying tetoktepba tanü agiogo aser tatembang round asüng, Hokolbar nü agitsü.
“Supercross tetoktepba ya atsübangba tesem ka nung renemba tetsükdaktsütem ajangdanga motor-cycle anishirtemi toktepa shilem agiba tetoktepba ka lir,” ta NAC Tir, Paul Rutsa-i osang jangjashitsü.
Tan tetoktepba ya FMSI temzüng amshia agiba den külemi, tetoktepba ajunga FMSCI ketdangsertemi tendangba osanga jangjaogo.
“Linük arentsü, lokti tentet lungjemdaktsütsü aser taküm tia junga alitsüren ajunga nung saisapongtsü ya tongti shilem ka lir,” ta tanü tetoktepba tenzüktsüdang tongti tesemdanger, Nagaland Parliamentary Secretary, Youth Resources & Sports, Music Task Force & State Lotteries, Khriehu Leizietsu-i metetdaktsü.
“Asayatsü sempet aliba aser temang tia junga ayuba ajanga dang asayar kati takok ngua shilem agitettsü,” ta shia, tan tetoktepba nung shilem agirtemi pei tajungtiba agüja shilem agitsü asoshi pai ajungshi.
“Nagaland den Northeast region ajunga nung Adventure saisapongtsü sabang tasen tentettsüba atema NAC dang pelar,” ta tongti tesemdangeri pelaba olen ka metetdaktsü.
Ano külen, tanü qualifying round nung Open shilem nung parnok 19, Novice shilem nung 12, Expert shilem nung 11 aser Local shilem nung 19 tashi takok ngua asüng shilem agitsü jenjang nguogo.