Kohima nung 12 buba GAG Torch Relay agitsü

Dimapur, January 30 (TYO): Kohima nung 12 buba South Asian Games (SAG) asayamong torch relay sentong agitsü renemshitsü tenzükogo.
India kübok North East nung tan mezüngsüa, taruba February ita 1-16 nü tashi Guwahati aser Shillong na nung iba asayamong ya asayatsü ayonga lir.
12 buba SAG asayamong den sentaktepa North East nung tentetba state shia nung asayamong milen bener asemtsü sentong ayonga agitsü asoshi India sorkar kübok Youth Affairs & Sports Ministry-i tuyuba ama, asayamong milen bener asemtsü sentong ya Nagaland nunga Kohima nung taruba February ita 1 nü agitsü asoshi Nagaland sorkar kübok Youth Resources & Sports (YRS) Ministry-i ayongogo.
12 SAG asayamong milen Kohima tonga tan January ita 31 nü tonga aotsü aser tasüng, February ita 1 nü milen bener asemtsü sentongji anepdang 6:30 ako nung Kohima kübok Table Tennis Indoor Stadium nungi tenzüka Khuochiezie (Local Ground) nung tembangtsü.
Iba sentong nung Nagaland tenüng nung shilem agir asayar tongtitem, Education Department nungi school kaketshirtem, Higher Education Department nungi college kaketshirtem, NSS volunteer-tem, NCC Cadets, Bharat Scouts & Guides, NYK-tem, YRS Department nungi Indira Gandhi Stadium Academy, Nagaland sorkar lenir aser yimsüsürtemi shilem agitsü renema lir.
Nagaland Olympic Association nung tenüng züluoka alir saisapongtsü teloktem, saisapongtsü meimer aser nüburtemi iba sentong nung shilem agitsü tayongzükba olen ka YRS Department-i metetdaktsüogo.