Kohima nung 12 buba SAG Torch Relay sentong agiogo

Kohima nung agiba 12 buba South Asian Games Torch Relay sentong nung Nagaland Chief Minister, TR Zeliang; Team Leader, Biswajit Basumatry; Nagaland yimsüsürtem; sorkar lenirtem; kaketshirtem aser asayartemi shilem agiba noksa nung angur. (Kohima, February 01)

Kohima, February 01 (TYO): India kübok North East nung tan mezüngsüa, tan February ita 5-16 nü tashi Assam kübok Guwahati aser Megahalaya kübok Shillong na nung agitsü ayongba 12 buba South Asian Games (SAG) asayamong den sentaktepa, asayamong milen bener asemtsü sentong ka Kohima nung tanü, Hombar nü agiogo.
Nagaland sorkar kübok Youth Resources & Sports (YRS) Department-i ayongba sentong ya Nagaland Chief Minister, TR Zeliang-i Kohima kübok Table Tennis Stadium nung tenzüktsüba sülen Kohima Local Ground nung tembanga liasü.
“Iba milen bener asemba sentong ya 12 buba SAG asayamong asoshi renemshia agiba tongti sentong lir,” ta shia, tanü tashi nung Nagaland sorkari iba sentong tajungtiba ayongba olen ka 12 buba SAG Torch Relay Team Leader, Biswajit Basumatary-i tesülen metetdaktsü.
Asayamong milen ya Delhi yimtiba nungi Shillong tonga taoba January ita 20 nü tonga bener aoba sülen Itanagar dak alaka, tanüngba North East state ajunga sema bener senzüba sülen yashi, Deobar nü Kohima tonga bener aru.
Iba milen ya Kohima nungi Itanagar tonga bener aoba sülen tan February ita 5 nü Guwahati tonga bener oa 12 buba SAG asayamong lapokba sentong nung tsükloktsü.
Tanü sentong nung Nagaland Olympic Association (NOA) Tir, Zeliang den külemi, Nagaland Cabinet Minister-tem, Parliamentary Secretary-tem, Advisors aser Chairman, NOA nungeri shilem agia liasü.
Nagaland tenüng nung asayar tongtitem, school aser college balala nungi kaketshirtem, NSS volunteer-tem, NCC cadets, Bharat Scouts & Guides, NYK-tem, Indira Gandhi Stadium Academy, yimsüsürtem aser Chief Secretary, Pankaj Kumar-i anir Nagaland sorkar lenirtemi tanü sentong nung shilem agia liasü.