Kohima nung AIDS candlelight memorial kaogo

Kohima, May 21 (TYO): Nagaland nung People Living with HIV & AIDS (PLHIV) nisungtem dang mesenmetui benshiba aser sendokba anema raratsü nüngdak, aser lokti nung parnok nem shilem agidaktsütsü nüngdak ta ajungshitepogo.
Deobar nikongdang Naga Hospital Authority Kohima (NHAK) nung Nagaland State AIDS Control Society aser Nagaland Network of PLHIV (NNP+) nati senteper “Ending AIDS together” omen nung ajemdaker International AIDS Candlelight memorial sentong ayonga amungdang NHAK Medical Superintendent, Dr. Thorhusie Katiri-i, “Lokti nung PLHIV tem (HIV aser AIDS keta alirtem) dang mesenmetui benshiba aser parnok sendokba melenshitsü atema nisungtem mulungsentsü melenshitsü nüngdaker, aser parnok akhi ama ‘normal life’ ka lidaktsütsü atema asenoki yaritsü nüngdaker,” ta metetdaktsü.
Parnok anema benshiba aser sendokba ajanga PLHIV aikati treatment agitsü atema tejakleni marur. Kodang HIV positive nisung kati ART (anti retroviral therapy) treatment agi tenzükdir pa/la temang anema litettsü, aser iba tashidak agi nisung asüba-a ajema akümtsü, ta Katiri-i ashi.
Iba dak sendakba nung pai ajak dang, senso tajung ka ama PLHIV atema longjemer inyaktsü ajungshi.
NNP+ Tir, Lanu-i iba anogomung teratet lemsatepdang pai, International AIDS Candlelight Memorial mapatong ya, HIV/AIDS tashidak agi masüba lima ka yangertsü aser parnok taküm akhi ama normal litettsüsa nüburtem ajungshitsü, iba den külemi HIV agi kongshia alirtem akhümtsübutsü, yaritsü aser parnok atema jembitsütsü atema lir, ta metetdaktsü.
Iba sentong nung shilem agirtemi shimo milen tsükloker AIDS tamaitsü noksa yangluba den HIV aser AIDS agi asürtem bilemteta sarasadema liasü.
Iba sentong ya Thejangunuo Theunuo leniba nung agi aser NHAK Chaplain, Vikepu Tepa-i tetenzük sarasadem agi aser NHAK Nursing student temi ken ka tena liasü.